February 02, 2022 | 09:36 am

رومان رئیس نے اسلام آباد کیخلاف وکٹ لیکر جشن نہ منانے کی وجہ بتادی

Rumman Raees nay islamabad united kay khilaf wicket lekat jashan na manay ki waja bata di
رپورٹ: فیضان لاکھانی۔۔۔ پی ایس ایل ٹیم ملتان سلطانز کے فاسٹ بولر رومان رئیس منگل کو اپنی سابقہ ٹیم اسلام آباد یونائٹیڈ کے خلاف میدان میں اترے ۔ یہ وہ ٹیم تھی جس کی جانب سے رومان رئیس چھ سال پی ایس ایل کا حصہ رہے ۔

اس میچ میں رومان رئیس نے شاداب خان کی اہم وکٹ حاصل کی اور ایک ایسے موقع پر حاصل کی جب شاداب خان میچ کا نقشہ بدل رہے تھے ۔ مگر رومان رئیس نے اس وکٹ کو حاصل کرنے کے بعد جشن نہیں منایا ۔

جیو نیوز کے رابطہ کرنے پر رومان رئیس نے بتایا کہ اسلام آباد یونائٹیڈ سے ان کی جذباتی وابستگی ہے اس وجہ سے انہوں نے ذہن بنایا ہوا تھا کہ کوئی بھی پلیئر کی وکٹ ہو ، وہ ٹیم کے احترام میں سیلبریٹ نہیں کریں گے۔

جیو کو بھجے گئے ویڈیو پیغام میں رومان رئیس نے کہا کہ وہ جس ٹیم کیخلاف میدان میں تھے ، چھ سال اسکا حصہ رہے ہیں، اس ٹیم نے ان کا کیرئیر بنانے میں اہم کردار ادا کیا اور زندگی کے اتار چڑھاو میں ساتھ کھڑی رہی اس لئے احترام میں وکٹ کو سیلبریٹ نہیں کیا۔

رومان رئیس نے کہا کہ ’’اسلام آباد یونائٹیڈ نے مجھے بطور ایمرجنگ پلیئر اٹھایا تھا اور بعد میں اس کی قیادت کا بھی موقع ملا، جب انجرڈ ہوا تب بھی ٹیم نے ساتھ دیا اور کرکٹ سے دور ہوا تو ٹیم نے بطور بولنگ کنسلٹنٹ ڈریسنگ روم میں رہنے کا موقع دیا اس لئے دل میں اسلام آباد یونائٹیڈ کا بہت احترام ہے اور یہی وجہ تھی کہ سیلبریٹ نہیں کیا۔‘‘

رومان رئیس نے کہا کہ وہ یہ سوچ کر ہی میدان میں اترے تھے کہ کسی کی بھی وکٹ ہو، وہ اسکا جشن نہیں منائیں گے۔

انہوں نے مزید کہا کہ پروفیشنل ازم اپنی جگہ پر موجود تھی ، جس ٹیم کیلئے کھیل رہے تھے اس کیلئے اپنا سو فیصد دیا لیکن اسلام آباد کیلئے جو جذباتی وابستگی اور احترام تھا اس کا بھی خیال رکھا۔

واضح رہے کہ رومان رئیس نے میچ میں شاداب خان کی وکٹ حاصل کی، شاداب خان نے 91 رنز کی اننگز کھیلی اور وہ میچ تقریبا ملتان سلطانز کے ہاتھ سے چھین چکے تھے، شاداب کی وکٹ نے ہی ملتان کو میچ میں واپسی اور پھر فتح کا موقع دیا۔