February 01, 2022 | 09:35 am

پی ایس ایل 7 سے کچھ خاص خاص

psl7 sae khuch khas khas
تحریر: غلام مصطفے عزیز۔۔۔ پاکستان سپر لیگ (پی ایس ایل) سیزن 7 میں کھیلے گئے تادم تحریر چھ میچوں کے خاص خاص ریکارڈز کے مطابق ٹاس جیت کر ہدف کا تعاقب کرنے والی تمام ٹیموں نے کامیابیاں حاصل کی ہیں۔ مجموعی طور پر 223.4 اوورز میں57 وکٹوں کے عوض ایک ہزار 957 رنز بنائے جاچکے ہیں۔

ملتان سلطانز نے کراچی کنگز کو7، پشاور زلمی نے کوئٹہ گلیڈی ایٹرز کو 5،ملتان سلطانز نے کوئٹہ گلیڈی ایٹرز کو 5، کوئٹہ گلیڈی ایٹرز نے کراچی کنگز کو 8، اسلام آباد یونائیٹڈ نے پشاور زلمی کو 9 اورلاہور قلندرز نے کراچی کنگز کو 6 وکٹوں سے شکست دی ہے۔

سب سے زیادہ مجموعی اسکورملتان سلطانز نے کوئٹہ گلیڈی ایٹرز کے خلاف 19.4 اوورز میں 5وکٹوں کے نقصان پر 209 رنز بنائے ہیں جبکہ سب سے کم اسکور کراچی کنگز نے کوئٹہ گلیڈی ایٹرز کے خلاف 17.3 اوورز میں 113 رنز بنائے ہیں۔ وکٹوں کے اعتبارسب سے بڑی جیت اسلام آباد یونائیٹڈ نے پشاور زلمی کے خلاف 25 گیند قبل 9 وکٹ سے حاصل کی ہے۔ لاہورقلندرز کے فخرزمان نے دو میچوں میں سب سے زیادہ182 رنز جبکہ کوئٹہ گلیڈی ایٹرز کے احسان علی نے دو میچوں میں 130رنز بنائے ہیں۔

دو میچوں میں ایک،ایک اننگز کھیل کر کوئی رن نہیں بنانے والے کھلاڑیوں میں محمدعمران، عمید آصف اور ڈی جے ویلے شامل ہیں۔ لیگ میں ابتک ایک سینچری فخر زمان نے بنائی ہے جبکہ 12 نصف سینچریاں بن چکی ہیں جن میں محمدرضوان اور احسان علی دو دو مرتبہ اور ول سمڈ،شان مسعود، اے ڈی ہیلز، فخر زمان، شرفین ردرفورڈ، شرجیل خان، پی آر اسٹرلنگ، حسین طلعت نے ایک ایک مرتبہ نصف سنچری بنائی ہے۔ سنچری پارٹرشپ 3 ہوچکی ہیں جس میں کوئٹہ گلیڈی ایٹرز کے احسان علی اور ول سمڈ کے درمیان 155،ملتان سلطانز کے شان مسعود اور محمد رضوان کے درمیان 150، اسلام آباد یونائیٹڈ کے پی آر اسٹرلنگ اور اے ڈی ہیلز کے درمیان 112 رنز کی پارٹنرشپ شامل ہے۔

اب تک بلند و بالا 61 چھکے اور 124 چوکے لگائے جاچکے ہیں۔ فخرزمان اور شرجیل خان نے 6، 6 چھکے لگائے ہیں جبکہ فخرزمان نے 23 اوراحسان علی اور شان مسعود نے 16، 16 چوکے لگئے ہیں۔ سب سے زیادہ وکٹیں حاصل کرنے والے بولر نسیم شاہ ہیں جنہوں نے دو میچوں میں 7.1 اوورز پھینک کر39 رنز کے عوض 6 وکٹیں حاصل کی ہیں۔

وہ ایک اننگز میں سب سے زیادہ وکٹ لینے والے بولر بھی ہیں، انہوں نے کراچی کنگز کے خلاف 3.3 اوورز میں 20 رنز دیکر 5 وکٹیں حاصل کی ہیں۔ پلیئر آف دی میچ کا ایوارڈ عمران طاہر،ول سمڈ، شان مسعود، نسیم شاہ، پال اسٹرلنگ اور فخرزمان حاصل کرچکے ہیں۔ وکٹ کے پیچھے ابتک 5 کھلاڑی آئوٹ ہوچکے ہیں۔ سرفراز احمد وہ واحد وکٹ کیپر ہیں جنہوں نے دو میچوں میں 3 کھلاڑیوں کو کیچ آئوٹ کیا ہے۔فیلڈنگ کے اعتبار سے 36 کیچ لئے جاچکے ہیں جس میں سب سے زیادہ4 کیچ افتخار احمد نے پکڑے ہیں۔