January 28, 2022 | 11:09 am

شاستری کے پاس دھونی کا فون نمبر کیوں نہیں؟ وجہ سامنے آگئی

shastri kay pas dhoni ka phone number kyo nahi waja samny agai
ایم ایس دھونی بھارتی کرکٹ ٹیم کے وہ سابق کھلاڑی ہیں کہ آج تک ان کا فون نمبر بہت کم لوگوں کے پاس ہے یہاں تک کہ روی شاستری کے پاس بھی دھونی کا فون نمبر موجود نہیں۔

بھارتی میڈیا رپورٹس کے مطابق سابق ہیڈ کوچ روی شاستری نے سابق فاسٹ بولر شعیب اختر کے یوٹیوب چینل پر اُن سے گفتگو کرتے ہوئے انکشاف کیا کہ ’دھونی ایک ایسے کرکٹر ہیں کہ جن کا فون نمبر بہت ہی کم لوگوں کے پاس ہے۔‘

روی شاستری نے کہا کہ ’اگر سچ کہوں تو آج تک میرے پاس بھی دھونی کا فون نمبر نہیں ہے اور نہ میں نے کبھی اُن سے مانگا۔‘

شاستری نے کہا کہ ’ایم ایس دھونی غیر حقیقی کھلاڑی تھا، میں نے اس جیسا کھلاڑی کبھی نہیں دیکھا، 0 یا 100 بنائیں، ورلڈ کپ اٹھائیں یا پہلے راؤنڈ میں ہار جائیں لیکن کبھی اُن کے رویے میں کوئی تبدیلی نہیں آئی۔‘

اُنہوں نے مزید کہا کہ ’میں نے بہت سارے کھلاڑی دیکھے ہیں لیکن دھونی جیسا پُرسکون کھلاڑی کوئی نہیں دیکھا، یہاں تک کہ سچن بھی ایک شاندار مزاج کے مالک تھے لیکن وہ کبھی کبھی غصے میں آجاتے تھے لیکن دھونی نے کبھی ایسے غصہ نہیں کیا۔‘

واضح رہے کہ ایم ایس دھونی اور روی شاستری کو آخری بار 2021 کے ٹی ٹوئنٹی ورلڈ کپ کے دوران بھارتی کرکٹ کے لیے ایک ساتھ کام کرتے ہوئے دیکھا گیا تھا، جو شاستری کا ہیڈ کوچ کے طور پر آخری ایونٹ تھا اور جس کے لیے دھونی کو ٹیم کے مینٹور کے طور پر شامل کیا گیا تھا۔