November 02, 2026 | 02:31 pm

پاکستانی رنرز کی نیویارک میراتھون میں شاندار کارکردگی

پاکستانی  رنر اور جیو نیوز کے اینکر محمد جنید دائیں جانب اور صادق شاہ بائیں جانب جنہوں نے یکم نومبر 2026 کو نیویارک سٹی میراتھون میں حصہ لیا / فوٹو: نمائندہ

رپورٹ: فیضان لاکھانی۔۔۔ دنیا کی آٹھ بڑی میراتھونز میں سے ایک نیویارک سٹی میراتھون 2026 میں پاکستانی اور پاکستانی نژاد رنرز نے متاثر کن کارکردگی کا مظاہرہ کیا، کراچی کے امین مکاتی نے 2 گھنٹے 53 منٹ 42 سیکنڈ میں ریس مکمل کرکے ایونٹ میں شریک پاکستانی رنرز میں سب سے تیز فنش کیا جبکہ جیو نیوز کے اینکر محمد جنید اور کراچی کے صادق شاہ نے ایبٹ ورلڈ میراتھون میجرز کی 6 اسٹار جرنی مکمل کرلی۔

اتوار، یکم نومبر کو منعقد ہونے والی نیویارک سٹی میراتھون میں پاکستان اور بیرن ملک مقیم پاکستانی رنرز کی بڑی تعداد نے شرکت کی۔ 42.195 کلومیٹر طویل اس میراتھون میں شرکا نے نیویارک کے پانچوں بروز سے گزرتے ہوئے سینٹرل پارک میں فنش لائن عبور کی۔

دستیاب نتائج کے مطابق کراچی کے امین مکاتی نے 2:53:42 کے وقت کے ساتھ نمایاں کارکردگی دکھائی، جبکہ کراچی ہی کے صادق شاہ نے 3:01:37 میں ریس مکمل کی۔ ملتان کے فہد مختار 3:16:23 کے ساتھ تیسرے نمایاں پاکستانی فنشرز میں شامل رہے۔

پاکستانی رنرز کی کارکردگی میں ایک اہم سنگ میل جیو نیوز کے اینکر محمد جنید اور صادق شاہ کا سکس اسٹار سفر مکمل کرنا بھی رہا۔ دونوں نے نیویارک میراتھون مکمل کرکے ایبٹ ورلڈ میراتھون میجرز کی تمام چھ میراتھنز مکمل کرنے کا اعزاز حاصل کیا۔

سکس اسٹار اعزاز کے لیے ٹوکیو، بوسٹن، لندن، برلن، شکاگو اور نیویارک کی ورلڈ میراتھون میجرز مکمل کرنا ضروری ہے، جس کے لیے طویل عرصے کی تیاری، مستقل مزاجی اور غیرمعمولی محنت درکار ہوتی ہے۔

امین مکاتی کی کامیابی کی خاص بات ان کی رفتار اور ریس کے بیشتر حصے میں رفتار کو برقرار رکھنا تھا۔

ریس ٹریکر کے مطابق امین نے ابتدائی 5 کلومیٹر 20 منٹ 44 سیکنڈ میں اور 10 کلومیٹر 40 منٹ 32 سیکنڈ میں مکمل کیے۔ انہوں نے ہاف میراتھون کا فاصلہ 1 گھنٹہ 25 منٹ 25 سیکنڈ میں طے کیا۔

امین 20 میل کا مرحلہ 2:12:00 میں عبور کرنے کے بعد 40 کلومیٹر کے مقام پر 2:44:31 کے وقت کے ساتھ پہنچے اور بالآخر 2:53:42 میں فنش لائن عبور کرلی۔

ان کے پہلے ہاف کا وقت تقریباً 1:25:25 جبکہ دوسرے ہاف کا وقت 1:28:17 رہا، یعنی دوسرے ہاف میں ان کی رفتار تقریباً 2 منٹ 52 سیکنڈ کم ہوئی۔

یہ اس بات کی نشاندہی کرتا ہے کہ امین نے ریس کے دوسرے حصے میں بھی اپنی رفتار کو نسبتاً مستحکم رکھا اور آخری مرحلے میں غیرمعمولی تھکاوٹ کے آثار کے بغیر تین گھنٹے سے کم وقت میں میراتھن مکمل کی۔

ان کی اوسط رفتار 6 منٹ 38 سیکنڈ فی میل، یعنی تقریباً 4 منٹ 7 سیکنڈ فی کلومیٹر رہی۔

صادق شاہ 3 گھنٹے کی حد سے معمولی فاصلے پر رہے، جبکہ جمال شاہ، جو امریکا کے شہر سنسناٹی میں مقیم پاکستانی رنر ہیں، نے 3:23:25 میں ریس مکمل کی۔ جمال شاہ اور جمال خان دو الگ رنرز ہیں۔

بروکلین میں مقیم بشیری انجم نے 3:35:05 میں میراتھن مکمل کی، جبکہ ڈاکٹر صفدر علی شیخ 3:52:53 اور جیو نیوز کے اینکر محمد جنید 3:53:07 کے وقت کے ساتھ فنش لائن تک پہنچے۔

نیو یارک میں مقیم جہان خان نے 3:53:34، عامر بٹ نے 4:00:45، افنان احمد نے 4:01:32 اور دانش رضا نے 4:01:34 میں ریس مکمل کی۔

شاہ فیصل خان نے 4:13:42، فہد قریشی نے 4:19:15، جبکہ عظیم سرور اور رافع انصاری نے یکساں طور پر 4:19:18 کا وقت لیا۔

انس جنید غنی نے 4:25:57، عمران ظفر نے 4:25:59 اور نوید حسین نے 4:30:34 میں ریس مکمل کی۔

خواتین رنرز میں کراچی کی حنا ملک نے 4:34:38، صبا خان نے 4:55:32 اور یسریٰ بخاری نے 5:28:04 میں فنش لائن عبور کی۔

کامران لاکھانی نے 4:36:06، حسن لڈھوبھائی نے 4:45:10، یوسف اسلم نے 5:22:08 اور حسن مدنی نے 5:28:29 میں میراتھن مکمل کی۔

ڈاکٹر سعد عثمانی نے 5:50:09، عالیہ زیدی نے 5:51:22، محمد یوسف ملک نے 6:03:51 اور میمونہ حمدانی نے 6:04:10 میں ریس مکمل کی۔