نیشنل چیمپئنز کپ: پاکستان گرینز کی پاکستان گولڈ کے خلاف 128 رنز سے فتح

ملتان میں جاری نیشنل چیمپئنز کپ کے میچ میں پاکستان گرینز نے شاندار کارکردگی کا مظاہرہ کرتے ہوئے پاکستان گولڈ کو 128 رنز سے شکست دے دی۔

ملتان کرکٹ اسٹیڈیم میں کھیلے گئے میچ میں پاکستان گرینز کے کپتان شاداب خان نے ٹاس جیت کر پہلے بیٹنگ کا فیصلہ کیا۔ گرینز نے مقررہ 50 اوورز میں 314 رنز بنائے اور اس کی پوری ٹیم آؤٹ ہوگئی۔

پاکستان گرینز کی جانب سے فخر زمان نے شاندار بیٹنگ کرتے ہوئے 115 رنز کی اننگز کھیلی، جبکہ عمر بن یوسف نے 74 اور کپتان شاداب خان نے 61 رنز بنائے۔

پاکستان گولڈ کی جانب سے شاہین شاہ آفریدی اور عبدالصبحان نے 3،3 وکٹیں حاصل کیں جبکہ محمد عمران، فیصل اکرم اور سعد خان نے ایک، ایک کھلاڑی کو آؤٹ کیا۔

315 رنز کے ہدف کے تعاقب میں پاکستان گولڈ کی ٹیم 37 اوورز میں 186 رنز بنا کر آل آؤٹ ہوگئی۔ اوپننگ بیٹر شامل حسین 53 رنز کے ساتھ نمایاں رہے، تاہم دیگر بیٹرز بڑی اننگز کھیلنے میں ناکام رہے۔

پاکستان گرینز کی جانب سے محمد حسنین نے عمدہ بولنگ کرتے ہوئے 3 وکٹیں حاصل کیں جبکہ مہران ممتاز نے 2 کھلاڑیوں کو پویلین کی راہ دکھائی۔ نسیم شاہ، فہیم اشرف، شاداب خان، فخر زمان اور عمر بن یوسف نے ایک، ایک وکٹ حاصل کی۔

یوں پاکستان گرینز نے پاکستان گولڈ کو 128 رنز کے واضح مارجن سے شکست دے کر میچ اپنے نام کرلیا۔