پی سی بی نے جنوبی افریقا کے مائیکل اسمتھ کو قومی ٹیم کا بیٹنگ کوچ مقرر کر دیا

پاکستان کرکٹ بورڈ (پی سی بی) نے جنوبی افریقا کے سابق کرکٹر مائیکل اسمتھ کو پاکستان مینز کرکٹ ٹیم کا نیا بیٹنگ کوچ مقرر کرنے کا اعلان کر دیا ہے۔

46 سالہ مائیکل اسمتھ پاکستان ٹیم کے ساتھ ریڈ بال اور وائٹ بال، دونوں فارمیٹس میں خدمات انجام دیں گے۔ ان کی تقرری دو سال کے لیے کی گئی ہے اور وہ 19 اگست سے انگلینڈ کے خلاف شروع ہونے والی تین ٹیسٹ میچز کی سیریز سے قبل قومی ٹیم کو جوائن کریں گے۔

مائیکل اسمتھ نے 2003 سے 2013 تک کے کیریئر میں 89 فرسٹ کلاس، 72 لسٹ اے اور 16 ٹی ٹوئنٹی میچز کھیلے۔ دائیں ہاتھ کے بیٹر نے تینوں فارمیٹس میں مجموعی طور پر 7 ہزار 29 رنز اسکور کیے جن میں 9 سنچریاں اور 40 نصف سنچریاں شامل ہیں۔

لیول4 کوچنگ کوالیفکیشن کے حامل مائیکل اسمتھ پاکستان سپر لیگ (پی ایس ایل) کی تین فرنچائزز اسلام آباد یونائیٹڈ، کراچی کنگز اور ملتان سلطانز کے کوچنگ اسٹاف کا حصہ رہ چکے ہیں۔

اس کے علاوہ وہ آسٹریلیا کی ہوبارٹ ہریکینز اور کرکٹ تسمانیہ کے ساتھ بطور بیٹنگ کوچ بھی خدمات انجام دے چکے ہیں، جبکہ کوچنگ کنسلٹنٹ کی حیثیت سے جنوبی افریقا کی کے زیڈ این اِن لینڈ اور ایسٹرن پروونس ٹیموں کے ساتھ بھی کام کر چکے ہیں۔