آئی سی سی نے امریکی کرکٹر پر 8 سال کی پابندی عائد کردی

انٹرنیشنل کرکٹ کونسل (آئی سی سی) نے امریکی کرکٹر بودوگم اخیلیش ریڈی پر ہر قسم کی کرکٹ کھیلنے پر 8 سال کی پابندی عائد کردی۔

آئی سی سی کے اینٹی کرپشن ٹریبونل نے 26 سالہ ریڈی کو اینٹی کرپشن کوڈ کی تین شقوں کی خلاف ورزی کا مرتکب قرار دیا۔

آئی سی سی کے مطابق یہ الزامات متحدہ عرب امارات میں کھیلے گئے ابوظبی ٹی10 لیگ 2025 کے دوران سامنے آئے تھے۔ 

آئی سی سی کے مطابق پابندی کا اطلاق 21 نومبر 2025 سے تصور کیا جائے گا جس دن انہیں عارضی طور پر معطل کیا گیا تھا۔

آئی سی سی کی رپورٹ کے مطابق ٹریبونل نے بودوگم اخیلیش ریڈی کو میچ کے نتیجے، دیگر پہلوؤں پر غیرقانونی اثر انداز ہونے یا اس کی کوشش کرنے، دوسرے کھلاڑی کو میچ فکسنگ پر اکسانے اور اینٹی کرپشن تحقیقات میں رکاوٹ ڈالنے کا قصوروار قرار دیا ہے۔

آئی سی سی کے مطابق تحقیقات کے دوران ریڈی نے اپنے موبائل فون سے ایسا ڈیٹا اور پیغامات بھی حذف کیے جو اینٹی کرپشن حکام کی تحقیقات میں اہم ثابت ہو سکتے تھے۔

بودوگم اخیلیش ریڈی امریکا کی جانب سے چار ٹی20 انٹرنیشنل میچز کھیل چکے ہیں۔