پاکستان ٹیسٹ ٹیم کے بیٹنگ کوچ کیلئے مائیک اسمتھ مضبوط امیدوار

رپورٹ: سہیل عمران۔۔۔ پاکستان ٹیسٹ ٹیم کے بیٹنگ کوچ کے عہدے کے لیے جنوبی افریقا کے سابق فرسٹ کلاس کرکٹر اور لیول فور کوچ مائیک اسمتھ کو مقرر کیے جانے کا امکان ہے۔

ذرائع کے مطابق مائیک اسمتھ انگلینڈ کےخلاف ٹیسٹ سیریز میں بیٹنگ کوچ کی ذمہ داریاں سنبھال سکتے ہیں۔ پاکستان نے رواں ماہ انگلینڈ کےخلاف تین ٹیسٹ میچز کی سیریز کھیلنی ہے۔

واضح رہے کہ قومی ٹیسٹ ٹیم کے ساتھ اسد شفیق عبوری بیٹنگ کوچ کے فرائض سر انجام دے رہے ہیں۔ مائیک اسمتھ پاکستان سپر لیگ میں ملتان سلطانز کے ساتھ کام کرچکے ہیں۔

پی سی بی نے مئی میں بیٹنگ کوچ کی تلاش کے لیے اشتہار دیا تھا اور بیٹنگ کوچ کے خواہشمند امیدواروں کے لیے درخواستیں جمع کرانے کی آخری تاریخ 7 جون تھی۔