امریکی صدر ڈونلڈ ٹرمپ فیفا ورلڈ کپ کا فائنل دیکھنے اسٹیڈیم جائیں گے

واشنگٹن: وائٹ ہاؤس نے تصدیق کی ہے کہ امریکی صدر ڈونلڈ ٹرمپ اتوار کو نیویارک، نیو جرسی اسٹیڈیم میں کھیلے جانے والے فیفا ورلڈ کپ 2026 کے فائنل میں ارجنٹینا اور اسپین کے درمیان ہونے والا مقابلہ دیکھنے کے لیے موجود ہوں گے۔

وائٹ ہاؤس کی پریس سیکریٹری کیرولین لیویٹ نے جمعرات کو پریس بریفنگ کے دوران تصدیق کرتے ہوئے کہا کہ صدر ٹرمپ ورلڈ کپ کے فائنل میں شرکت کے منتظر ہیں۔

انہوں نے کہا کہ صدر کی موجودگی ایسے ورلڈ کپ کا اختتام ہوگی جو امریکی تاریخ کا سب سے زیادہ دیکھا جانے والا، سب سے محفوظ اور سب سے کامیاب ورلڈ کپ ثابت ہوا ہے۔

کیرولین لیویٹ نے مزید کہا کہ انہیں یہ معلوم نہیں کہ صدر ٹرمپ فائنل میں کس ٹیم کی حمایت کریں گے۔

انہوں نے یہ بھی بتایا کہ صدر ٹرمپ جمعہ کو نیویارک سٹی میں واقع ٹرمپ ٹاور میں ہونے والی فیفا کی استقبالیہ تقریب میں بھی شرکت کریں گے۔

یاد رہے کہ فیفا کے صدر جیانی انفانٹینو نے 23 جون کو اعلان کیا تھا کہ صدر ڈونلڈ ٹرمپ 19 جولائی کو ہونے والے ورلڈ کپ فائنل میں فاتح ٹیم کو ٹرافی پیش کریں گے۔

دوسری جانب میڈیا رپورٹس کے مطابق ورلڈ کپ فائنل میں 80 ہزار سے زائد شائقین کی اسٹیڈیم میں موجودگی متوقع ہے، جبکہ نیویارک کے مین ہیٹن میں واقع سینٹرل پارک میں تقریباً 50 ہزار افراد بڑی اسکرین پر میچ دیکھیں گے۔

واضح رہے کہ فیفا ورلڈ کپ 2026 کا فائنل اتوار کو ارجنٹینا اور اسپین کے درمیان کھیلا جائے گا جبکہ تیسری پوزیشن کے میچ میں انگلینڈ کا مقابلہ فرانس سے ہفتے کی شب ہوگا۔