پاکستان کے دوسرے بہترین جیولین تھرور یاسر سلطان معیاری جیولین سے محروم

رپورٹ: سہیل عمران۔۔۔ پاکستان کے دوسرے بہترین جیولین تھرور یاسر سلطان معیاری جیولین سے محروم ہیں اور انٹرنیشنل معیار کے جیولین کے بغیر پریکٹس کرنے پر مجبور ہیں۔

پنجاب اسٹیڈیم لاہور میں ٹریننگ کے موقع پر گفتگو کرتے ہوئے یاسر سلطان نے کہا کہ میرے پاس مقامی طور پر تیار ہونے والے جیولین ہیں، ارشد ندیم سے جیولین ادھار لے کر پہلے ٹریننگ کرتا تھا مگر آج کل میری اور ارشد ندیم کی ٹریننگ ایک ہی وقت میں ہوتی ہے ارشد ندیم سے ان کی ٹریننگ کے وقت جیولین مانگنا مناسب نہیں لگتا۔

یاسر سلطان کا کہنا ہے کہ انہوں نے فیڈریشن کو جیولین کے لیے کہا تو پھر فیڈریشن نے پاکستان اسپورٹس بورڈ کو جیولین کے لئے خط لکھا ہے مجھے امید ہے کہ مجھے معیاری جیولین مل جائیں گے اور میری تیاری مزید اچھی ہو گی۔

انہوں نے کہا کہ کامن ویلتھ گیمز میرے لیے بہت بڑا ایونٹ ہے جس کے لیے پرجوش ہوں، ارشد ندیم کے ساتھ اتنے بڑے پلیٹ فارم پر مقابلہ کرنا اعزاز کی بات ہوگی۔

انہوں نے کہا کہ ارشد ندیم کے ہونے سے سپورٹ بھی ہوتی اور ساتھ میں اچھا پرفارم کرنے کا پریشر بھی ہوتا ہے نئے کوچ کے ساتھ فٹنس پر کام زیادہ کیا ہے، اچھے نتائج کے لیے پر امید ہوں۔