شاہد آفریدی خیبر پختونخوا چیمپئنز کرکٹ لیگ کے برانڈ ایمبیسیڈر مقرر

پاکستان کرکٹ ٹیم کے سابق کپتان شاہد آفریدی کوخیبر پختونخوا چیمپئنز کرکٹ لیگ (کے سی ایل) کا برانڈ ایمبیسیڈر مقررکیاکردیا گیا ہے۔

خیبر پختونخوا چیمپئنز کرکٹ لیگ کی لانچنگ تقریب 18 جولائی کو شام 6 بجے عمران خان کرکٹ اسٹیڈیم پشاور میں ہوگی۔

شاہد آفریدی نے خیبر پختونخوا، خصوصاً پشاور کے عوام اور کرکٹ شائقین سے اپیل کی ہے کہ وہ اپنے اہلِ خانہ کے ہمراہ اس تاریخی تقریب میں شرکت کریں، نوجوان کرکٹرز کی حوصلہ افزائی کریں اور صوبے میں کرکٹ کے اس نئے سفر کا حصہ بنیں۔

خیبر پختونخوا چیمپئنز لیگ کے لیگ کمشنر اور سابق قومی کپتان یونس خان بھی اس منصوبے کے اہم ستون کے طور پر تقریب میں شریک ہوں گے جبکہ پاکستان کے متعدد معروف سابق اور موجودہ انٹرنیشنل کرکٹرز بھی اس تاریخی تقریب کی رونق بڑھائیں گے۔

واضح رہے کہ تقریب کے دوران لیگ کی باقاعدہ تاریخوں کا اعلان کیا جائے گا جبکہ صوبہ بھر میں ہونے والے ٹیلنٹ ہنٹ ٹرائلز، لیگ کی اہم تفصیلات، آئندہ سرگرمیوں اور دیگر بڑے اعلانات بھی کیے جائیں گے۔

کے سی ایل انتظامیہ نے عوام، خصوصاً فیملیز، کی سہولت کے لیے خصوصی انتظامات کیے ہیں جبکہ شائقین کی شرکت کے لیے فری ٹکٹس بھی مختص کیے گئے ہیں۔