پی ایچ ایف نے ڈچ کوچ ہرمن کروئس سے معاہدہ طے کرلیا

پاکستان ہاکی فیڈریشن (پی ایچ ایف) نے ڈچ کوچ ہرمن کروئس کو نیشنل ہاکی کوچنگ ایڈوائزر مقرر کر دیا ہے۔

ہرمن کروئس عالمی شہرت یافتہ ڈچ ہاکی کوچ اور ہائی پرفارمنس ماہر ہیں اور ان کی تقرری ابتدائی طور پر 2 سال کے لیے کی گئی ہے۔

پی ایچ ایف کے صدر محی الدین وانی کا کہنا ہے کہ نئے ایڈوائزر سینئر اور جونیئر قومی ٹیموں کی کوچنگ اور ترقی میں رہنمائی کریں گے۔

محی الدین وانی نے بتایا کہ ہرمن کروئس ہاکی ورلڈ کپ کے آغاز سے قومی ٹیم کے ساتھ اپنی ذمہ داریاں سنبھالیں گے اور یہ تقرری قومی ہاکی کی بحالی کی جامع حکمت عملی کا حصہ ہے۔

انہوں نے کہا کہ پاکستان ہاکی میں جدید کوچنگ، ٹیلنٹ ڈویلپمنٹ اور ہائی پرفارمنس سسٹم متعارف کرایا جائے گا۔

صدر محی الدین وانی نے کہا کہ پی ایچ ایف پاکستان ہاکی کی بحالی کے لیے مزید عالمی معیار کے کوچز لارہی ہے۔

واضح رہے کہ ورلڈ کپ کے بعد ایشین گیمز سمیت اہم ایونٹس کی تیاری کی قیادت ہرمن کروئس کریں گے۔