جرمنی کیخلاف تاریخی فتح پر پیراگوئے کے صدر نے عام تعطیل کا اعلان کردیا

پیراگوئے کے صدر سانتیاگو پینا نے فیفا ورلڈ کپ 2026 میں جرمنی کے خلاف تاریخی فتح کی خوشی میں منگل کو ملک بھر میں عام تعطیل کا اعلان کر دیا۔

ورلڈ کپ کے راؤنڈ آف 32 میں پیراگوئے نے چار مرتبہ کی عالمی چیمپئن جرمنی کو پنالٹی شوٹ آؤٹ میں 3 کے مقابلے میں 4 گول سے شکست دے کر پری کوارٹر فائنل میں جگہ بنائی۔

بوسٹن اسٹیڈیم میں کھیلے گئے راؤنڈ آف 32 کے اس میچ میں مقررہ اور اضافی وقت کے اختتام پر مقابلہ 1-1 سے برابر تھا مگر پھر پنالٹی شوٹ آؤٹ مقابلے میں پیراگوئے نے وہ کامیابی حاصل کی جسے ورلڈ کپ کی تاریخ کے بڑے اپ سیٹس میں شمار کیا جا رہا ہے۔

صدر سانتیاگو پینا نے سماجی رابطے کی ویب سائٹ ایکس پر تعطیل کے اعلان کے ساتھ اپنی تصویر بھی شیئر کی جس میں وہ سرکاری حکم نامے پر دستخط کرتے نظر آرہے ہیں۔

صدر کی جانب سے جاری کیے گئے حکم نامے میں کہا گیا کہ جرمنی کے خلاف یہ فتح صرف کھیل تک محدود نہیں بلکہ اس کی قومی اہمیت بھی ہے، اسی لیے حکومت اس عظیم کامیابی پر خاموش نہیں رہ سکتی۔

فیفا ورلڈکپ : پیراگوئے نے 4 بار کے عالمی چیمپئن جرمنی کو ٹورنامنٹ سے باہر کر دیا

فیفا ورلڈکپ : پیراگوئے نے 4 بار کے عالمی چیمپئن جرمنی کو ٹورنامنٹ سے باہر کر دیا

صدر سانتیاگو پینا نے کہا کہ یہ ضروری ہے کہ تمام پیراگوئین اس تاریخی کامیابی کا جشن ایک ساتھ منا سکیں، اسی مقصد کے لیے ملک بھر میں عام تعطیل کا اعلان کیا گیا ہے۔

علم میں رہے کہ پیراگوئے اب 4 جولائی کو فلاڈیلفیا میں پری کوارٹر فائنل میں فرانس اور سویڈن کے درمیان ہونے والے میچ کی فاتح ٹیم کا سامنا کرے گا۔