سلمان علی آغا کو سلہٹ ٹیسٹ میں غصہ مہنگا پڑگیا

سلمان علی آغا کو بنگلا دیش کے خلاف سلہٹ ٹیسٹ میں ضابطہ اخلاق کی خلاف ورزی پر انٹرنیشنل کرکٹ کونسل (آئی سی سی) کی جانب سے سرزنش کا سامنا کرنا پڑگیا۔

آئی سی سی نے پاکستانی آل راؤنڈر سلمان علی آغا کو لیول ون کوڈ آف کنڈکٹ کی خلاف ورزی پر تنبیہ جاری کی۔

آئی سی سی کے مطابق سلمان علی آغا نے پلیئرز اور سپورٹ اسٹاف کے لیے بنائے گئے کوڈ آف کنڈکٹ کے آرٹیکل 2.2 کی خلاف ورزی کی، جو میچ کے دوران کرکٹ سامان، گراؤنڈ آلات یا دیگر اشیا کے غلط استعمال سے متعلق ہے۔

مذکورہ واقعہ سلہٹ ٹیسٹ میں پاکستان کی دوسری اننگز کے 82ویں اوور میں پیش آیا جب آؤٹ ہونے کے بعد سلمان علی آغا نے پویلین واپس جاتے ہوئے غصے میں بیٹ اشتہاری بورڈ پر دے مارا۔

اس خلاف ورزی پر سلمان علی آغا کے ڈسپلنری ریکارڈ میں ایک ڈی میرٹ پوائنٹ شامل کردیا گیا۔ پاکستانی کرکٹر نے اپنی غلطی تسلیم کرتے ہوئے میچ ریفری جیف کرو کی جانب سے تجویز کردہ سزا قبول کرلی، جس کے باعث باقاعدہ سماعت کی ضرورت پیش نہیں آئی۔

اس سے قبل بھی سلمان علی آغا رواں سال 13 مارچ کو ڈھاکا میں بنگلا دیش کے خلاف ون ڈے میچ کے دوران اسی نوعیت کی خلاف ورزی کے مرتکب پائے گئے تھے۔ یہ ان کی  دوسری غلطی ہے جس کے بعد ان کے مجموعی ڈی میرٹ پوائنٹس کی تعداد 2 ہوگئی ہے۔