شان مسعود نے بنگلا دیش کیخلاف ٹیسٹ میچز میں شکست کی وجہ بتا دی

بنگلا دیش کے ہاتھوں ٹیسٹ سیریز میں کلین سوئپ کے بعد قومی ٹیم کے کپتان شان مسعود نے شکست کی بڑی وجہ اہم مواقع ضائع کرنا قرار دے دیا۔

سیریز کے دوسرے اور آخری ٹیسٹ میں 78 رنز کی شکست کے بعد گفتگو کرتے ہوئے شان مسعود نے کہا کہ پاکستان نے میچ میں کئی غلطیاں کیں جن کا نقصان اٹھانا پڑا۔

انہوں نے کہا کہ چوتھی اننگز میں 360 رنز بنانے کے بعد عموماً ٹیم جیت کی پوزیشن میں ہوتی ہے، لیکن ابتدائی تین اننگز میں پاکستان نے ایسے مواقع گنوائے جنہوں نے میچ کا رخ بدل دیا۔

شان مسعود کے مطابق بنگلا دیش جب 116 رنز پر 6 کھلاڑی آؤٹ تھے تو پاکستان کو میچ پر گرفت مضبوط کرنی چاہیے تھی، مگر آخری چار وکٹوں نے قیمتی رنز بنا ڈالے۔

ڈھاکا سے سلہٹ تک پاکستان کی ناکامی، بنگلا دیش کا تاریخی کارنامہ

ڈھاکا سے سلہٹ تک پاکستان کی ناکامی، بنگلا دیش کا تاریخی کارنامہ

قومی کپتان کے مطابق پاکستان جب 142 رنز پر 4 وکٹ کے نقصان پر تھا تو سیٹ بیٹرز کو بڑی اننگز کھیل کر میچ ختم کرنا چاہیے تھا، لیکن ٹیم ایسا نہ کرسکی۔

قومی کپتان نے کہا کہ ٹیسٹ کرکٹ بے رحم کھیل ہے جہاں چھوٹی چھوٹی غلطیاں بھی مہنگی پڑتی ہیں، اس لیے ٹیم کو زیادہ مستقل مزاجی دکھانا ہوگی۔

انہوں نے مزید کہا کہ پاکستان کئی ٹیسٹ میچز میں جیت کی پوزیشن میں آیا لیکن اختتامی لمحات میں میچ ختم کرنے میں ناکام رہا۔

واضح رہے کہ سلہٹ ٹیسٹ میں بنگلا دیش نے 437 رنز کے ہدف کے دفاع میں پاکستان کو 358 رنز پر آؤٹ کرکے تاریخی فتح اپنے نام کی۔

بنگلا دیش کے اسپنر تیج الاسلام نے تباہ کن بولنگ کرتے ہوئے 6 کھلاڑیوں کو آؤٹ کیا اور اپنی ٹیم کی فتح میں مرکزی کردار ادا کیا جبکہ کھیل کے بہترین کھلاڑی لٹن داس قرار پائے اور سیریز کے بہترین کھلاڑی کا ایوارڈ مشفیق الرحیم نے حاصل کیا۔