توانائی کی بچت کیلئے بنگلادیش کرکٹ بورڈ نے میچز کے اوقات کار تبدیل کر دیے

بنگلادیش کرکٹ بورڈ نے توانائی کی بچت کے لیے بڑا فیصلہ کرتے ہوئے میچز کے اوقات کار تبدیل کر دیے، کرکٹ بورڈ کا کہنا ہے کہ حکومت کی توانائی بچاؤ مہم کی حمایت کے لیے میچز کے اوقات میں تبدیلی کرنے کا فیصلہ کیا ہے۔

بی سی بی کا کہنا ہے کہ نظرِ ثانی شدہ اوقات کا اعلان مناسب وقت پر کیا جائے گا، میچز کے اوقات کار پر نظرثانی کا مقصد دن کی روشنی سے زیادہ فائدہ اٹھانا ہے۔

کرکٹ ویب سائٹ کے مطابق بی سی بی نے نیوزی لینڈ مینز اور سری لنکا ویمنز کے ساتھ شیڈول سیریز کے اوقات کار میں تبدیلی کی ہے، بنگلادیش اور نیوزی لینڈ مینز ٹیموں کے درمیان تین ون ڈے میچوں کی سیریز ڈے نائٹ کھیلی جانی ہے، تینوں ون ڈے میچز اب صبح 11 بجے شروع ہوں گے، پہلے دو میچز 17 اور 20 اپریل کو ڈھاکا جبکہ تیسرا میچ چٹوگرام میں 23 اپریل کو کھیلا جائے گا۔

بنگلادیش اور سری لنکا ویمنز ٹیموں کے درمیان تین ٹی ٹونٹی میچز کی سیریز بھی اب دن میں کھیلی جائے گی، تینوں میچز اب شام 6:30 بجے کی بجائے دوپہر 2 بجے شروع ہوں گے۔

کرکٹ ویب سائٹ کے مطابق بنگلادیش اور سری لنکا ویمنز ٹیموں کے درمیان ٹی ٹونٹی سیریز کے میچز سلہٹ میں کھیلے جائیں گے، ٹی ٹوئنٹی سیریز کا پہلا میچ 28 اپریل، دوسرا 30 اپریل اور تیسرا میچ 2 مئی کو کھیلا جائے گا۔