اولمپک گولڈ میڈلسٹ ارشد ندیم کی رمضان میں بھی بھرپور ٹریننگ جاری

رپورٹ: سہیل عمران۔۔۔ اولمپک گولڈ میڈلسٹ ارشد ندیم نے سیزن 2026 میں عمدہ کارکردگی کا مظاہرہ کرنے کے لیے بھرپور ٹریننگ کا سلسلہ جاری رکھا ہوا ہے اور رمضان کے مہینے میں بھی کوچ سلمان اقبال بٹ کی نگرانی میں معمول کے مطابق ٹریننگ کر رہے ہیں کہتے ہیں کہ ٹارگٹ ایک ہی کہ اس سیزن میں اچھا پرفارم کرنا ہے۔

اولمپک گولڈ میڈلسٹ ارشد ندیم نے پنجاب اسٹیڈیم میں رات کے ٹریننگ سیشن کے موقع پر جیو نیوز سے گفتگو کرتے ہوئے کہا کہ آنے والا سیزن بہت بھرپور ہے متعدد ایونٹس میں حصہ لینا ہے ڈیڑھ دو ماہ سے مسلسل ٹریننگ کر رہا ہوں۔ رمضان کی وجہ سے ٹریننگ کے معمول میں فرق نہیں آیا صرف وقت تبدیل کیا ہے اور اب رمضان کی وجہ سے رات کے وقت میں ٹریننگ کر رہے ہیں جو اچھی جا رہی ہے۔

ارشد ندیم نے کہا کہ سب سے پہلے مئی میں ڈائمنڈ لیگ ہے پھر کامن ویلتھ گیمز اور ایشین گیمز بھی ہیں اگست میں بھی ڈائمنڈ لیگ ہے اور ہنگری میں ورلڈ کا مقابلہ ہو گا سب میں حصہ لینا ہے۔

انہوں نے کہا کہ ٹریننگ سے مطمئن ہوں ٹریننگ اچھی جا رہی ہے امید ہے اچھا پرفارم کروں گا۔

دوسری جانب ارشد ندیم کے کوچ سلمان اقبال بٹ نے کہا کہ اسٹرنتھ اینڈ کنڈیشنگ کے مرحلے سے نکل چکے ہیں رمضان کے بعد مقابلے کی مکمل ٹریننگ کی طرف جائیں گے۔

انہوں نے کہا کہ فٹنس اچھی ہے ٹریننگ کے پیرا میٹرز بھی اچھے ہیں امید ہے سیزن اچھا ہو گا، کامن ویلتھ گیمز ایشین گیمز اور ورلڈ ایتھلیٹکس کا منفرد مقابلہ ہنگری میں الٹی میٹ چیمپئین شپ ہے ان تمام ایونٹس کو ٹارگٹ کیا ہوا ہے کہ اچھا مقابلہ کرنا ہے۔