سن رائزر ز لیڈز کے کوچ ڈینیل ویٹوری نے ابرار احمد کو منتخب کرنے کی وجہ بتا دی

انگلینڈ کی دی ہنڈریڈ لیگ 2026 کی پلیئر آکشن میں آئی پی ایل ٹیم سن رائزرز حیدرآباد کی مالکن کاویا مران نے سن رائزر ز لیڈز کے لیے پاکستانی اسپنر ابرار احمد کو کروڑوں روپے میں حاصل کرلیا۔

اس حوالے سے دی ہنڈریڈ کی ٹیم سن رائزر ز لیڈز کے کوچ ڈینیل ویٹوری برطانوی میڈیا سے گفتگو کرتے ہوئے کہا کہ ہمارے پاس آپشن تھے لیکن ابرار احمد ہماری ترجیح تھے۔

ڈینیل ویٹوری نے کہا کہ ابرار احمد کے پاس منفرد ورائٹی ہے ، خاص طور پر ڈومیسٹک کھلاڑیوں نے انہیں پہلے نہیں دیکھا۔

ان کا کہنا تھا کہ پاکستان کے کھلاڑیوں کے حوالے سے بہت کچھ کہا جا رہا تھا لیکن منتخب نہ کرنے کے حوالے سے کوئی ہدایت نہیں تھی۔

انہوں نے کہا کہ ہم آکشن میں تمام کھلاڑیوں کی دستیابی کے ساتھ داخل ہوئے اور تمام کھلاڑیوں کی دستیابی کے ساتھ انٹر نیشنل ٹیموں کے کئی اچھے اسپنرز سامنے آئے۔

واضح رہے کہ بھارتی ملکیتی سن رائزرز لیڈز نے ابرار احمد کو 1 لاکھ 90 ہزار پاونڈز میں خریدا جبکہ بھارتی مالکان کو پاکستان سے کرکٹر کو ٹیم میں شامل کرنے پر سخت تنقید کا سامنا ہے۔

انگلینڈ کے ڈومیسٹک کرکٹ ٹورنامنٹ دی ہنڈرڈ میں کئی پاکستانی کھلاڑیوں نے اپنے آپ کو رجسٹر کرایا تھا تاہم اب تک صرف 2 پاکستانی کھلاڑی ہی منتخب ہوئے ہیں جن میں ابرار احمد اور عثمان طارق شامل ہیں۔

پاکستان کے مسٹری اسپنر ابرا ر احمد کو انڈین پریمیئر لیگ سے منسلک فرنچائز سن رائزرز لیڈز نے 1 لاکھ 90 ہزار پاؤنڈ (تقریباً 7 کروڑ 12 لاکھ پاکستانی روپے) میں سائن کیا ہے جبکہ برمنگھم فیونکس نے پاکستانی اسپنر عثمان طارق کو 1 لاکھ 40 ہزار پاؤنڈ (تقریباً 5 کروڑ 32 لاکھ پاکستانی روپے) میں خرید لیا۔