بھارتی لیگ کی پیٹ کمنز اور ٹریوس ہیڈ کو خریدنے کی بڑی آفر، کرکٹرز کا بکنے سے انکار

رپورٹ: سہیل عمران۔۔۔ بھارتی لیگ کے ایک ٹیم گروپ نے آسٹرلیا کے کرکٹرز کو ڈالرز کا لالچ دیا مگر کرکٹرز نے ڈالروں کے بجائے نیشنل ڈیوٹی کو ترجیح دی۔

اس حوالے سے آسٹریلوی میڈیا کی رپورٹ کے مطابق دو آسٹریلوی کرکٹرز کو آسٹریلوی کرکٹ چھوڑنے کے لیے 10 ملین ڈالرز کی پیشکش کی گئی، کرکٹرز کو تقریبا 10 ملین ڈالرز کا سالانہ دینے کا کہا گیا۔

آسٹریلوی میڈیا کا کہنا ہے کہ کپتان پیٹ کمنز اور نائب کپتان ٹریوس ہیڈ کو کل وقتی اورسیز ٹی ٹوئنٹی لیگز کھیلنے کے لیے پیشکش کی گئی مگر ان دونوں نے بھارتی پیشکش کو ٹھکرا دیا تھا۔

آسٹریلوی میڈیا کے مطابق ان کرکٹرز کو پیشکش بھارتی پریمئیر لیگ کے ایک ٹیم گروپ نے رواں برس کے آغاز میں کی، کرکٹرز نے بھارت کے ٹیم گروپ کو بتایا کہ ان کی ملک سے مکمل کمٹ منٹ ہے۔

آسٹریلوی رپورٹ میں بتایا گیا کہ ٹاپ آسٹریلوی کرکٹرز نیشنل کنٹریکٹس سے سال میں 1.5 ملین ڈالرز کماتے ہیں، پیٹ کمنز کپتانی کا الاؤنس ڈال کر تقریبا 3 ملین ڈالرز کماتے ہیں۔

آسٹریلوی میڈیا نے انکشاف کیا کہ ڈالروں کی پیشکش کا انکشاف بگ بیش لیگ کو پرائیویٹائز کرنے کے حوالے سے ہونے والے اجلاس میں ہوا اس اجلاس میں کہا گیا کہ کرکٹ آسٹریلیا کی مالی معاملات میں کس قدر کمزوری پائی جاتی ہے۔

یاد رہے کہ 2023 میں انگلینڈ کے جوفرا آرچر کو بھارتی لیگ کی ایک ٹیم نے پیشکش کی تھی اور آرچر کو ایک سال کے لیے 7.5 ملین ڈالرز کی آفر کی گئی تھی جو انہوں نے قبول کرنے منع کردیا تھا۔