ایشیا کپ میں ٹیم کی پرفارمنس کے بعد تھنک ٹینک نے مشاورت کا آغاز کر دیا

رپورٹ: سہیل عمران۔۔۔ ایشیا کپ 2025 میں پاکستان ٹیم کی کارکردگی کی بنیاد پر پاکستان کرکٹ بورڈ (پی سی بی) کے تھنک ٹینک نے مشاورت کا آغاز کر دیا ہے۔

ذرائع کا بتانا ہے کہ ٹی ٹوئنٹی کپتان سلما ن علی آغا کی کارکردگی پر غور جاری ہے کیونکہ وہ کپتانی اور بیٹنگ میں توقعات پر پورا نہیں اتر سکے۔

ذرائع کا کہنا ہے کہ جنوبی افریقہ کے خلاف ہوم سیریز میں وائٹ بال سیریز کے لیے اسکواڈز پر مشاورت کا عمل جاری ہے اور ٹی ٹوئنٹی اسکواڈ میں دو سے تین تبدیلیوں کا امکان ہے۔

ذرائع کے مطابق ٹی ٹوئنٹی ٹیم میں سینئر کھلاڑیوں کی واپسی اور نئے کھلاڑیوں کی شمولیت پر بھی بات چیت چل رہی ہے، ون ڈے اسکواڈ میں بھی چند تبدیلیاں متوقع ہیں مگر فی الحال اسکواڈز میں تبدیلیوں کے حوالے سے حتمی فیصلہ ابھی نہیں ہو سکا۔

علم میں رہے کہ جنوبی افریقہ کے خلاف تین ٹی ٹوئنٹی اور تین ون ڈے میچز کی سیریز شیڈولڈ ہے جس کا آغاز 28 اکتوبر سے ہورہا ہے۔