پاکستان ہاکی ٹیم کا ایشیا کپ میں شرکت سے انکار: ہاکی انڈیا کا دعویٰ

رپورٹ: سہیل عمران۔۔۔ ہاکی انڈیا کے آفیشل نے دعویٰ کیا ہے کہ پاکستان ہاکی ٹیم بھارت میں ہونے والے ایشیا کپ ہاکی ٹورنامنٹ میں شرکت نہیں کرے گی۔

ہاکی انڈیا کے ایک آفیشل نے بھارتی اخبار سے گفتگو کرتے ہوئے کہا کہ بھارتی حکومت پاکستان ہاکی ٹیم کو ویزے جاری کرنے پر آمادہ تھی، تاہم پاکستان ہاکی فیڈریشن (پی ایچ ایف) نے سیکورٹی وجوہات کی بنیاد پر بھارت کا سفر کرنے سے انکار کر دیا ہے۔

ہاکی انڈیا کے مطابق پاکستان ہاکی فیڈریشن نے بدھ کو ایشین ہاکی فیڈریشن کو باضابطہ طور پر خط لکھا ہے جس میں واضح کیا گیا ہے کہ سیکیورٹی خدشات کے باعث پاکستان ٹیم ایونٹ میں شرکت نہیں کر سکتی۔

ہاکی انڈیا کا کہنا ہے کہ پاکستان نے جولائی کے آخر میں ویزوں کے لیے درخواست دی تھی تاہم اب فیڈریشن نے شرکت سے انکار کر دیا ہے اور اب اس انکار کے بعد ہاکی انڈیا نے بنگلہ دیش کو متبادل کے طور پر ایشیا کپ میں شرکت کی دعوت دے دی ہے۔

واضح رہے کہ ایشیا کپ ہاکی ٹورنامنٹ 29 اگست سے 7 ستمبر تک بھارت کے شہر راج گیر میں شیڈول ہے۔

اس کے علاوہ پاکستان جونیئر ہاکی ٹیم کے نومبر دسمبر میں بھارت میں ہونے والے جو نئیر ہاکی ورلڈ کپ میں بھی شرکت غیر یقینی ہے۔