ہم ورلڈ کپ کو مدنظر رکھ کر سیریز کھیل رہے ہیں: سلمان علی آغا

رپورٹ: سہیل عمران۔۔۔ ویسٹ انڈیز کے خلاف تین میچز پر مشتمل سیریز میں 2-1 سے کامیابی حاصل کرنے کے بعد پاکستان ٹیم کے کپتان سلمان علی آغا نے کہا کہ ہم نے جتنی بھی سیریز کھیلی ہیں یا آگے کھیلنی ہیں وہ تمام ورلڈ کپ کو مدنظر رکھ کر کھیل رہے ہیں۔

لاؤڈر ہل میں میڈیا سے گفتگو کرتے ہوئے سلمان علی آغا نے کہا کہ بنگلہ دیش کے خلاف ہوم اور اوے سیریز اب ویسٹ انڈیز پھر ٹرائی نیشن اور ایشیا کپ یہ تمام سیریز ورلڈ کپ کو دیکھ کر کھیل رہے ہیں اور ہمارا گول یہی ہے کہ ورلڈ کپ کو کیسے جیتنا ہے۔

سلمان علی آغا نے کہا کہ دبئی کی کنڈیشنز کافی مختلف ہیں اور ان کنڈیشنز کے بعد جب دبئی جائیں گے تو ہمیں اس کا کافی فائدہ ہوگا، کہہ سکتے ہیں کہ پہلے دو میچز سے آج کی پچ بہتر تھی۔

پاکستان نے ویسٹ انڈیز کیخلاف ٹی ٹوئنٹی سریز 2-1 سے جیت لی

پاکستان نے ویسٹ انڈیز کیخلاف ٹی ٹوئنٹی سریز 2-1 سے جیت لی

سلمان علی آغا نے بتایا کہ میں نے آج بالنگ کرنے کا سوچا تھا مگر دو بائیں ہاتھ کے بیٹرز کھیل رہے تھے اور ایک اینڈ سے صائم ایوب کر رہا تھا، دیکھنا ہوتا ہے کہ دونوں طرف سے پریشر کیسے بنا سکتے ہیں۔

انہوں نے کہا کہ اس سیریز میں صائم ایوب اچھی بالنگ کر رہا تھا دوسری طرف پریشر بڑھانے کے لیے صفیان مقیم سے بھی بالنگ کروانی تھی مگر آگے آپ مجھے بالنگ کرتے ہوئے دیکھیں گے۔

کپتان سلمان علی آغا نے کہا کہ ہم نے سوچا تھا کہ اگر 160یا 170 کرتے ہیں تو ڈیفینڈ کر لیں گے مگر جس طرح سے اوپنرز نے آغاز دیا اور ایسا اسٹارٹ ملے تو آپ 180 یا 190 کر لیتے ہیں۔

اپنی بات کو جاری رکھتے ہوئے سلمان علی آغا نے کہا کہ صاحبزادہ فرحان اور صائم ایوب اچھا اسٹارٹ دے رہے ہیں اور دونوں کے لیے خوشی ہے اور میں امید کرتا ہوں کہ دونوں آگے بھی ایسی پرفارم کرتے رہیں گے۔

انہوں نے کہا کہ اندازہ تھا کہ پاور پلے میں جب گیند پرانا ہوگا تو جتنا بھی اچھا پچ ہو گیند گرپ ضرور کرے گا اور وہی ہوا، ڈیتھ اوورز میں حارث اور صفیان نے جس طرح سے بالنگ کی انہیں کریڈٹ دینا چاہیے۔