ریڈ بال کوچ کیلئے مصباح الحق سمیت کئی نام زیر غور

رپورٹ: سہیل عمران۔۔۔ پاکستان کرکٹ بورڈ (پی سی بی) نے ٹیسٹ سیریز کی ابھی سے تیاری کے لیے بھی پلان تیار کر لیا ہے۔

ذرائع کا بتانا ہے کہ ریڈ بال کے لیے فوری طور پر ہیڈ کوچ مقرر نہیں کیا جا رہا مگر مصباح الحق سمیت کئی نام زیر غور ہیں۔

اس کے علاوہ ذرائع کا بتانا ہے کہ قومی کرکٹ ٹیموں ، شاہینز ، ایمرجنگ اور ایج گروپس ٹیموں کے لیے بھی پلان تیار کیا گیا ہے اور ڈائریکٹر ہائی پرفارمنس عاقب جاوید نے پلان منظوری کے لیے پیش کر دیا ہے۔

ذرائع کا کہنا ہے کہ بائیو مکینکس لیب کو مقامی یونیورسٹی سے نیشنل کرکٹ اکیڈمی لاہور منتقل کرنے کا پلان ہے جس سے کرکٹرز کو جدید آلات اور سافٹ وئیرز کے ساتھ ٹریننگ دی جائے گی۔

ذرائع کے مطابق فیصل آباد اور سیالکوٹ کے ہائی پرفارمنس سینٹرز کو آباد کرنے کا منصوبہ ہے، سیالکوٹ میں انڈر 13 اور انڈر15 ایج گروپس کے کھلاڑیوں کے پروگرامز ہوں گے جبکہ فیصل آباد میں انڈر 17 ایج گروپ کے کھلاڑیوں کے طویل ٹریننگ پروگرام ہوں گے۔

ذرائع کا یہ بھی کہنا ہے کہ ملتان میں انڈر 19 اور کراچی میں ویمن کرکٹرز کے سنٹرز ہوں گے، نیشنل کرکٹ اکیڈمی میں 30 سے 35 کرکٹرز کی ٹریننگ قومی ٹیم کی بنچ اسٹرنتھ کے لیے ہو گی۔