پاکستان مینز کرکٹ ٹیم کے ساتھ کام کرنے کا تجربہ اچھا رہا: حنا منور

رپورٹ: سہیل عمران۔۔۔ پاکستان ویمن کرکٹ ٹیم کی منیجر حنا منور کا کہنا ہے کہ پاکستان مینز ٹیم کے ساتھ مینجر آپریشنز کے طور پر کام کرنے کا تجربہ اچھا رہا، اس سلسلے کو جاری رہنا چاہیے ، پاکستان ٹیم کے اسٹاف میں بھی خاتون اسٹاف کی تقرری ہونی چاہیے ۔

پولیس آفیسر حنا منور گزشتہ برس چیف سیکیورٹی آفیسر کے طور پر پاکستان ویمن کرکٹ میں آئیں اور پھر انہیں منیجر مقرر کر دیا گیا ۔ سہہ ملکی سیریز سے قبل حنا منور کو پاکستان کرکٹ ٹیم کے سپورٹ اسٹاف میں منیجر آپریشنز کے طور پر شامل کر لیا گیا اور اب ایک بار پھر وہ پاکستان ویمن کرکٹ ٹیم کے مینجر کے طور پر کام کر رہی ہیں ۔

لاہور میں جیو نیوز سے گفتگو کرتے ہوئے حنا منور نے کہا کہ پاکستان کرکٹ ٹیم کے کھلاڑیوں اور سپورٹ اسٹاف کے دیگر اراکین نے بہت تعاون کیا ، یہ ایک اچھا تجربہ رہا ، مینز ٹیم کے ساتھ خاتون کی تقرری اچھا اور مثبت قدم تھا اور مستقبل میں بھی ہونا چاہیے ۔

حنا منور نے کہا کہ پوری دنیا میں سپورٹ اسٹاف میں خواتین شامل ہوتی ہیں مگر ہمارے ہاں عجیب سمجھا جاتا ہے۔

ویمن ٹیم کے ساتھ مرد ہوں گے تو کچھ اچھا کر کے جائیں گے اسی طرح مینز ٹیم کے ساتھ خواتین ہوں گی تو وہ کچھ سیکھ کر جائیں گی مینز ٹیم کے ساتھ خاتون کی تقرری ویمن امپاورمنٹ ہے تفریق ختم ہونی چاہیے۔

حنا منور کا کہنا ہے کہ خواتین کرکٹرز بڑی سلجھی ہوئی ہیں ، مجھے زیادہ کوشش نہیں کرنا پڑ رہی ، انہیں پیغام دے دیا گیا ہے اور وہ اس پر عمل کر رہی ہیں اور مینجر کی حیثیت یہی چیز درکار ہو تی ہے کہ جو آپ نے کہا ہے وہ دیکھنا ہے کہ اس پر عمل ہو رہا ہے یا نہیں ۔

انہوں نے کہا کہ مہارت بڑھانے کے ساتھ ڈسپلن پر عمل بہت اہم ہے مجھے زیادہ افسری نہیں جھاڑنا پڑ رہی ، ایک ہی پیغام ہے کہ ڈسپلن میں رہیں کوچز کی باتوں پر عمل کریں اور زیادہ سے زیادہ ٹریننگ سے فائدہ اٹھائیں۔