چیمپئنز ٹرافی کی جیت پر بھارتی کپتان روہت شرما کو انعام مل گیا

آئی سی سی چیمپئینز ٹرافی میں روہت شرما کی قیادت میں بھارتی ٹیم ناقابل شکست رہی اور اس جیت پر بھارتی کپتان روہت شرما کو انعام مل گیا۔

بھارتی میڈیا کے مطابق روہت شرما کو ٹیسٹ کی کپتانی میں توسیع مل گئی اور اب روہت شرما انگلینڈکے خلاف ٹیسٹ سیریز میں بھارتی ٹیم کی قیادت کریں گے۔

بھارتی میڈیا کا کہنا ہے کہ جون سے اگست تک ہونے والے دورہ انگلینڈ کے لیے روہت شرما کو اعتماد کا ووٹ مل گیا ہے۔

بھارتی میڈیا کے مطابق چیمپئنز ٹرافی کی جیت کے ساتھ مین منجمنٹ اور میچ کی صورت کو جانچنے کی صلاحیت شاندار رہی لہٰذا سلیکٹرز نے روہت شرما پر نئے سرے سے اعتماد کا اظہار کیا ہے۔

رپورٹ کے مطابق روہت شرما کو یقین دہانی کرا دی گئی ہے کہ وہ انگلینڈ کے خلاف سیریز میں کپتان ہوں گے۔

واضح رہے کہ بورڈر گواسکر ٹرافی میں شکست کے بعد روہت شرماکی کپتانی خدشات کا شکار تھی، روہت شرما کی انفرادی کارکردگی بھی ناقص رہی تھی تین ٹیسٹ میچز میں انہوں نے صرف 31 رنز بنائے تھے۔

بورڈر گواسکر ٹرافی میں سیریز کے آخری ٹیسٹ میں روہت شرما کو ڈراپ بھی کردیا گیا تھا۔

بھارتی میڈیا کا کہنا ہے کہ چیمپئنز ٹرافی کے تمام اسٹیک ہولڈر سمجھتے ہیں ٹیسٹ میں اب بھی روہت شرما کپتانی کے لیے بہترین چوائس ہیں۔