چیمپئنز ٹرافی: بھارتی کرکٹ ٹیم کے ساتھ اہلخانہ دبئی نہیں جائیں گے

رپورٹ: سہیل عمران۔۔۔آئی سی سی چیمپینز ٹرافی 2025 کے سلسلے میں کرکٹ ٹور پر فیملیز کےلیے بھارتی کرکٹ بورڈ بی سی سی آئی کی نئی پالیسی پر عملدرآمد شروع ہوگیا۔

بھارتی میڈیا کا کہنا ہے کہ چیمپئنز ٹرافی میں بھارتی ٹیم کے کھلاڑی اہل خانہ کے بغیر متحدہ عرب امارات (یو اے ای) جائیں گے، کوئی بھی کھلاڑی اپنے ساتھ اہل خانہ کو لے کر نہیں جائے گا۔

بھارتی ٹیم چیمپئنز ٹرافی میں شرکت کےلیے 15 فروری کو دبئی جائے گی۔ بھارتی بورڈ کی کھلاڑیوں کی نئی فیملی پالیسی کے مطابق 45 دن سے زیادہ کے ٹور کے دوران کھلاڑیوں کے ساتھ 2 ہفتے تک اہل خانہ رہ سکتے ہیں۔

بھارتی کرکٹ بورڈ کے ایک عہدیدار نے میڈیا سے گفتگو کرتے ہوئے کہا کہ ابھی تک کے مطابق کھلاڑی اپنے ساتھ بیوی یا کسی ساتھی کو نہیں لے جاسکیں گے۔

بی سی سی آئی عہدیدار کا کہنا تھا کہ سینئر کھلاڑی نے پالیسی کا پوچھا تو انہیں جواب ملا کہ پالیسی کے مطابق ہی چلیں گے۔ ایک مہینے سے کم دورانیے کے دوران اہلِ خانہ کے ساتھ ٹور کرنے کی اجازت نہیں ہے۔

اس نے یہ بھی بتایا کہ غیر معمولی کیس کی صورت میں کھلاڑی کو فیملی کے تمام اخراجات خود اٹھانے ہوں گے۔

واضح رہے کہ بی سی سی آئی نے نئی فیملی پالیسی آسٹریلیا کے خلاف بارڈر گواسکر ٹرافی کے بعد بنائی تھی۔