آئی سی سی نے سرفراز احمدکو چیمپئنز ٹرافی کا سفیر مقرر کردیا

رپورٹ: سہیل عمران۔۔۔ انٹرنیشنل کرکٹ کونسل (آئی سی سی) نے چیمپئنز ٹرافی کے لیے ایمبیسیڈر کی تقرری کا اعلان کردیا ہے جس کے مطابق پاکستان ٹیم کے سابق کپتان سرفراز احمد اور بھارت کے شیکر دھون سمیت نیوزی لینڈ کے ٹم ساؤتھی اور آسٹریلیا کے شین واٹسن کو چیمپئنز ٹرافی کے لیے سفیر مقرر کئے گئے ہیں۔

واضح رہے کہ یہ تمام ایمبیسیڈرز آئی سی سی چیمپئنز ٹرافی کے دوران میچز پر اپنی رائے دیں گے۔

اس بارے میں سرفراز احمد کا کہنا ہے کہ چیمپئنز ٹرافی کی جیت کا لمحہ میں کبھی نہیں بھول سکتا کیونکہ 2017 کی چیمپئنز ٹرافی کی جیت کے بعد پوری قوم ہمارے ساتھ کھڑی تھی۔

اپنی بات کو جاری رکھتے ہوئے سرفراز احمد نے کہا کہ چیمئنز ٹرافی کی جیت کا جشن ہمیشہ میرے دل کے قریب رہے گا، کرکٹ کیلنڈر میں چیمپئنز ٹرافی کی واپسی اور اتنے اسپیشل ایونٹ کی میزبانی پاکستان کو ملنے پر خوشی ہے۔

سرفراز احمد نے کہا کہ اس فارمیٹ کا مطلب ہے کہ اس میں ہر میچ اہم ہے اور بطور ایمبیسیڈر اپنا رول ادا کرنے کے لیے بیتاب ہوں۔

بھارتی کرکٹر شیکھر دھون کا کہنا ہے کہ چیمپئنز ٹرافی کا سفیر بننا میرے لیے ایک خاص احساس ہے، اگلے چند ہفتوں میں دنیائے کرکٹ کی بہترین ٹیمیں وائٹ جیکٹ کے لیے مقابلہ کرتی نظر آئیں گی۔

شین واٹسن نے کہا کہ چیمپئنز ٹرافی ایک منفرد ایونٹ ہے جس نے ہمیں کئی یادگار لمحات دیئے۔