January 24, 2025 | 10:35 am

چیمپئنز ٹرافی: مختلف ٹیموں کے پاکستان میں پریکٹس میچز کا امکان کم

آئی سی سی چیمپئنز ٹرافی کا آغاز کراچی میں 19 فروری سے پاکستان اور نیوزی لینڈ کے درمیان میچ سے ہوگا مگر اس بات کے امکانات کم ہیں کہ چیمپئنز ٹرافی سے قبل مختلف ٹیمیں پاکستان میں وارم اپ میچ کھیل سکیں۔

کیونکہ پاکستان، نیوزی لینڈ اور جنوبی افریقا کی ٹیمیں سہ فریقی ٹورنامنٹ میں مصروف ہوں گی جبکہ بھارت اور بنگلہ دیش کی ٹیمیں دبئی میں ہوں گی۔

جبکہ انگلینڈ، آسٹریلیا اور سری لنکا کے لیے ابھی تک کوئی وارم اپ میچ شیڈول نہیں کیا گیا ہے۔

دوسری جانب میگا ایونٹ سے قبل کپتانوں کی فوٹو شوٹ اور پریس کانفرنس کیلئے روہت شرما کراچی آئیں گے یا نہیں اس بارے میں بھارتی بورڈ نے نئی دہلی سے اجازت طلب کی ہے۔

کپتانوں کا ایونٹ ممکنہ طور پر 16 یا 17 فروری کو کراچی میں ہوگا۔ بھارتی کرکٹ بورڈ کے سیکرٹری دیوجیت سائیکیا کا کہنا ہے کہ اس حوالے سے بات چیت نہیں ہوئی، یہ معاملہ ابھی ایجنڈے پر نہیں ہے۔