January 23, 2025 | 09:38 am

چیمپئنز ٹرافی: روہت شرما پاکستان آئیں گے یا نہیں فیصلہ نہ ہو سکا

رپورٹ: سہیل عمران۔۔۔ آئی سی سی چیمپئنز ٹرافی کے لیے بھارتی کپتان روہت شرما کی کپتانوں کے ایونٹ کے لیے پاکستان آمد کا معاملہ اب تک واضح نہ ہوسکا۔

ایک کرکٹ ویب سائٹ کے مطابق کپتان روہت شرما کے پاکستان جانے کی کوئی وضاحت نہیں ملی ہے۔

ویب سائٹ کے مطابق ابھی اس بات کی تصدیق نہیں ہو ئی کہ روہت شرما کے لیے بھارتی بورڈ کو حکومتی اجازت درکار ہے۔

دوسری جانب بھارتی کرکٹ بورڈ کے سیکریٹری دیو جیت سائیکیا کا کہنا ہے کہ روہت شرما کے پاکستان جانے کے حوالے سے بات چیت نہیں ہوئی ہے اور یہ معاملہ ابھی ایجنڈے پر نہیں ہے۔

خیال رہے کہ پی سی بی پہلے ہی آئی سی سی سے زور دے کر کہہ چکا ہے کہ سب کچھ پالیسیوں اور روایت کے مطابق ہونا چاہیے۔

واضح رہے کہ بھارتی کرکٹ ٹیم کی شرٹ پر پاکستان کا نام لکھنے کا معاملہ پہلے ہی حل ہو چکا ہے اور بھارتی سیکریٹری کہہ چکے ہیں کہ آئی سی سی قوانین پر عمل درآمد کیا جائے گا۔

علم میں رہے کہ آئی سی سی ٹی ٹوئنٹی ورلڈ کپ 2024 سے قبل کپتانوں کی پریس کانفرنس نہیں ہو ئی تھی کیونکہ ایونٹ میں شریک ٹیمیں ویسٹ انڈیز اور امریکہ کے شہروں میں وارم اپ میچز میں مصروف تھیں۔

آئی سی سی چیمپئنز ٹرافی کے کپتانوں کا ایونٹ ممکنہ طور پر 16 یا 17 فروری کو کراچی میں ہو گا۔