January 21, 2025 | 09:23 am

چیمپئنز ٹرافی کیلئے پاکستان کے اسکواڈ کو حتمی شکل دینے کیلئے مشاورت جاری

رپورٹ: سہیل عمران۔۔۔ آئی سی سی چیمپئنز ٹرافی کے لیے پاکستان ون ڈے اسکواڈ کو حتمی شکل دینے کے لیے مشاورت جاری ہے۔

اس بارے میں ذرائع کا بتانا ہے کہ چیمپئنز ٹرافی سے قبل پاکستان ٹیم نے سہہ فریقی سیریز میں حصہ لینا ہے اور صائم ایوب کا فیصلہ ہو گیا تو سہہ فریقی سیریز کی ٹیم ہی چیمپئینز ٹرافی کے لیے ٹیم ہو گی۔

ذرائع کا کہنا ہے کہ صائم ایوب کے فٹ نہ ہونے کی صورت میں سلیکٹرز نے متبادل کا فیصلہ کر لیا ہے، آؤٹ آف فارم عبداللہ شفیق کی اسکواڈ میں جگہ مشکل ہے اور عثمان خان کے بھی ڈراپ ہونے کا امکان ہے۔

ذرائع کے مطابق فخر زمان کی اسکواڈ میں شمولیت یقینی ہے جبکہ امام الحق اور حسیب اللہ کے ناموں پر بھی غور کیا جارہا ہے۔

ذرائع کا کہنا ہے کہ محمد رضوان ،بابر اعظم ، سلمان آغا ، طیب طاہر ، عرفان خان کی اسکواڈ میں شمولیت ہوگی جبکہ محمد حسنین ، نسیم شاہ ، شاہین آفریدی حارث روف کی بھی اسکواڈ میں شمولیت یقینی ہے اور کامران غلام ، ابرار احمد اور سفیان مقیم بھی اسکواڈ کا حصہ ہوں گے۔

خیال رہے کہ پاکستان کے علاوہ چیمپئینز ٹرافی کی تمام ٹیموں نے اسکواڈز کا اعلان کر دیا ہے ، پاکستان آئی سی سی کو ابتدائی اسکواڈ کے نام بھجوا چکا ہے۔

واضح رہے کہ 11 فروری تک حتمی اسکواڈ کا لازمی اعلان کرنا ہے ، سہہ فریقی کا پہلا میچ 8 فروری کو ہو گا۔