اپنے بہتر مستقبل کیلئے کرکٹر عثمان قادر آسٹریلیا چلے گئے

رپورٹ: سہیل عمران۔۔۔ قومی کرکٹر عثمان قادر کرکٹ میں اپنے بہتر مستقبل کے لیے آسٹریلیا چلے گئے۔

انٹر نیشنل کرکٹر عثمان قادر نے نیو ساوتھ ویلز میں رہائش اختیار کر لی ہے اور وہ سڈنی میں ہاکسبری کلب کی جانب سے کھیل رہے ہیں۔

عثمان قادر نے ساوتھ آسٹریلیا کی نمائندگی کی جبکہ پرتھ اور ایڈیلیڈ کی جانب سے بی بی ایل بھی کھیلی، عثمان قادر کو آسٹریلیا کی پرائم منسٹر الیون کی جانب سے بھی کھیلنے کا اعزاز ملا۔

کرکٹر عثمان قادر نے گزشتہ برس اکتوبر میں مایوس ہو کر پاکستان کرکٹ سے ریٹائر منٹ لے لی تھی۔

واضح رہے کہ عثمان قادر اپنے مرحوم والد عبدالقادر کی خواہش پر آسٹریلیا چھوڑ کر پاکستان آئے تھے کیونکہ سابق کرکٹر عبدالقادر اپنے بیٹے عثمان قادر کو پاکستان کی جانب سے کھیلتا دیکھنا چاہتے تھے۔

عثمان قادر نے ایک ون ڈے اور 25 ٹی ٹوئنٹی انٹر نیشنل میچز میں پاکستان کی نمائندگی کی ہے مگر اب آسٹریلیا میں ہی کرکٹ کھیلنے کے پلان کے ساتھ عثمان قادر دوبارہ آسٹریلیا چلے گئے۔

اس بارے میں کرکٹر عثمان قادر کا کہنا ہے کہ کرکٹ ہی میرا روز گار ہے ، مستقبل کے پلان کے ساتھ آسٹریلیا آیا ہوں اور میں پر اُمید اور پر عزم ہوں کہ کرکٹ میں ہی مجھے اچھے مواقع ملیں گے۔

دوسری جانب ذرائع کا بتانا ہے کہ عثمان قادر کی فیملی بھی جلد آسٹریلیا چلی جائے گی۔