پاکستان ٹیسٹ اسکواڈ میں شامل کھلاڑی کل جنوبی افریقہ روانہ ہوں گے

رپورٹ: سہیل عمران۔۔۔ جنوبی افریقہ کے خلاف 2 ٹیسٹ میچز کی سیریز کھیلنے کے لیے پاکستان ٹیسٹ اسکواڈ میں شامل کھلاڑیوں کا دستہ کل جنوبی افریقہ روانہ ہوگا۔

ذرائع کے مطابق ٹیسٹ اسکواڈ کے کھلاڑی لاہور اور کراچی سے دبئی میں اکٹھے ہوں گے۔

قومی کرکٹرز دبئی سے جوہانسبرگ کے لیے روانہ ہوں گے جبکہ ریڈ بال ہیڈ کوچ جیسن گلیپسی بھی کل ساوتھ افریقہ پہنچیں گے۔

ریڈ بال ٹیم کا پری ٹیسٹ سیریز کیمپ جنوبی افریقہ میں لگایا جائے گا، دونوں ملکوں کی ٹیموں کے درمیان پہلا ٹیسٹ 26 دسمبر سے سینچورین میں اور دوسرا ٹیسٹ میچ 3 جنوری سے کیپ ٹاون میں کھیلا جائے گا۔

علم میں رہے کہ بابر اعظم ، محمد رضوان سلمان علی آغااور صائم ایوب تینوں فارمیٹ کی وجہ سے پہلے ہی ساوتھ افریقہ میں موجود ہیں جبکہ نسیم شاہ ، کامران غلام ، عبداللہ شفیق ون ڈے اور ٹیسٹ اسکواڈ میں شامل ہیں۔

ٹیسٹ ٹیم کے کپتان شان مسعود اور نائب کپتان سعود شکیل کے ساتھ خرم شہزاد اور میر حمزہ ساوتھ افریقہ روانہ ہوں گے اور دیگر کھلاڑیوں میں محمد عباس ، عامر جمال ، حسیب اللہ اور نعمان علی بھی جنوبی افریقہ روانہ ہوں گے۔