چیمپئنز ٹرافی معاملہ، پی سی بی تاحال اپنے موقف پر قائم

پاکستان کرکٹ بورڈ (پی سی بی)چیمپئنز ٹرافی معاملے پر اپنے موقف پر ڈٹا ہوا ہے۔

ذرائع پی سی بی کے مطابق کرکٹ کے میگا ایونٹ کے حوالے سے فیصلہ اب انٹرنیشنل کرکٹ کونسل (آئی سی سی) اور بھارتی کرکٹ بورڈ (بی سی سی آئی) نے کرنا ہے۔

ذرائع کے مطابق پاکستان اگلے 3 برس بھارت جا کر کوئی میچ نہیں کھیلے گا، فیوژن ماڈل کے تحت پاک بھارت آئی سی سی میچ نیوٹرل وینیو پر ہی ہوں گے۔

پی سی بی ذرائع کے مطابق پاکستان اصولی موقف پر کسی قسم کا سمجھوتہ نہیں کرے گا۔

اس سے قبل یہ اطلاعات سامنے آئی تھیں کہ بھارتی بورڈ چیمپئنز ٹرافی فیوژن فارمولے پر کھیلنے کےلیے راضی ہوگیا ہے مگر یہی فارمولا اپنے ایونٹس پر لاگو نہیں کرنا چاہتا۔

بھارتی میڈیا رپورٹس کے مطابق پاکستان بھارت میں ہونے والے آئی سی سی ایونٹ کے گروپ میچز نیوٹرل وینیو پر کھیلے لیکن اگر پاکستان سیمی فائنل یا فائنل میں پہنچے تو اسے بھارت میں کھیلنا ہوگا ۔

بھارتی میڈیا نے یہ بھی دعویٰ کیا ہے کہ پاکستان بھارت میں ہونے والے آئی سی سی ایونٹس کا بائیکاٹ کرے گا تو اسے آئی سی سی اور براڈکاسٹرز کی جانب سے قانونی چارہ جوئی کا سامنا کرنا پڑسکتا ہے۔

پی سی بی نے چیمپینز ٹرافی سمیت اگلے 3 سال تک بھارت میں شیڈول آئی سی سی ایونٹس کے لیے فیوژن ماڈل پیش کیا۔

ماڈل کے مطابق اگر بھارت پاکستان میں کوئی میچ نہیں کھیلے گا تو پاکستان بھی آئی سی سی کے کسی میچ کےلیے اپنی ٹیم بھارت نہیں بھیجے گا، پاکستان اپنے موقف سے پیچھے ہٹنے کےلیے تیار نہیں۔