آسٹریلیا سے ایک بھی ون ڈے جیت گئے تو بڑی کامیابی ہوگی: وسیم اکرم

رپورٹ: سہیل عمران۔۔۔ پاکستان اور آسٹریلیا کے درمیان 4 نومبر سے شروع ہونے والی وائٹ بال سیریز کے حوالے سے سابق فاسٹ بولر نے کہا کہ آسٹریلیا میں کنڈیشنز مشکل ہوتی ہیں ، پاکستان کی یہاں سیریز آسان نہیں ہو گی ایک بھی ون ڈے جیت جاتے ہیں تو یہ بہت بڑی کامیابی ہے جبکہ ٹی ٹوئنٹی سیریز اچھی ہو گی۔

سابق کپتان پاکستان کرکٹ ٹیم وسیم اکرم نے میلبرن میں آن لائن پریس کانفرنس کے دوران کہا کہ فخرزمان امپیکٹ پلیئر ہے اور مجھے یقین ہے کہ سوشل میڈیا بیان فخر نے نہیں لکھا، جس نے بھی لکھا اسے بتانا چاہیے تھا کہ سنٹرل کنٹریکٹ کی وجہ سے آپ کو مسئلہ ہو سکتا ،میں سمجھتا ہوں کہ یہ فخر زمان کے لیے ایک سبق ہے ، سوچ سمجھ کر سوشل میڈیا پر لکھنا چاہیے ، پی سی بی کا اس معاملے پر اپ سیٹ ہونا بنتا تھا۔

وسیم اکرم کا کہنا ہے کہ محسن نقوی کرکٹ کے لیے بہت اچھا کام کر رہے ہیں پروفیشنل انداز میں چلا سکتے ہیں مجھے جاب کی آفر ہوئی لیکن میں 9 سے 5 جاب کرنے والا بندہ نہیں ہوں۔

آسٹریلیا میں کبھی نہیں جیتے لیکن تاریخ بدلے گی، کپتان محمد رضوان

آسٹریلیا میں کبھی نہیں جیتے لیکن تاریخ بدلے گی، کپتان محمد رضوان

وسیم اکرم نے ایک سوال کے جواب میں کہا کہ محمد رضوان کو کپتانی کا تجربہ ہے وہ اچھی چوائس ہے وہ بس کھیل پر فوکس کرے۔

ہوم ایڈوانٹیج کے لیے پچز بنانے پر تنقید کرنے والوں کے حوالے سے انہوں نے کہا کہ ہمیں دشمنوں کی ضرورت نہیں ہم خود ہی بہت ہیں ، ہوم ایڈوانٹیج پر تنقید سمجھ سے باہر ہے میں 5 ، 6 سال سے کہہ رہا ہوں ٹرننگ پچز بناو چاہے ہار جاو ، شکر ہے کسی کو تو خیال آیا اور ہم نے مسلسل تین ٹیسٹ میچز ہارنے کے بعد مسلسل دو ٹیسٹ میچز جیتے۔

وسیم اکرم نے کہا کہ خوشی ہے کہ 2026 ٹی ٹوئنٹی ورلڈ کپ کی تیاری کے لیے نوجوان کھلاڑیوں کو موقع دیا گیا ، شاہین آفریدی، نسیم شاہ سمیت دیگر کرکٹرز کھیل پر فوکس کریں ، سوشل میڈیا کو چھوڑ دیں ،کرکٹ کھیل کر گھر جائیں اور انجوائے کریں ، بابر اعظم کو بھی کپتانی بھول جانی چاہیے ، کرکٹ کھیلیں رنز کریں۔

اگلے سال چیمپئنز ٹرافی کی میزبانی کے بارے میں وسیم اکرم نے کہا کہ چیمپئنز ٹرافی کے لیے بھارت سے اچھے اشارے مل رہے ہیں ، پاکستان کرکٹ بورڈ نے بھارتی بورڈ کو کئی آفرز کی ہیں لہٰذا بھارت کو پاکستان آنا چاہیے۔

وسیم اکرم نے کہا کہ ویرات کوہلی ، ہردیک پانڈیا اور سوریا کمار یا دیو کے پاکستان میں بہت فینز ہیں ، انہیں شدت سے انتظار ہے اور میں سمجھتا ہوں کہ دونوں ممالک کے لوگوں کا آپس میں رابطہ ہونا چاہیے بھارت اس بارے میں سوچے۔

وسیم اکرم نے کہا کہ میں چھ سات سال سے بھارت نہیں گیا ، میں وہاں کے کھانے اور لوگوں کو مس کرتا ہوں ،بھارتی کھلاڑی پاکستان آئیں انجوائے کریں گے۔

آسٹریلیا کے خلاف ون ڈے سیریز کا شیڈول:

پہلا ون ڈے 4 نومبر، میلبرن

دوسرا ون ڈے 8 نومبر، ایڈلیٹ

تیسرا ون ڈے 10 نومبر، پرتھ

آسٹریلیا کے خلاف ٹی ٹوئنٹی سیریز کا شیڈول:

پہلا ٹی ٹوئنٹی 14 نومبر، برسبن

دوسرا ٹی ٹوئنٹی 16 نومبر، سڈنی

تیسرا ٹی ٹوئنٹی 18 نومبر، ہابرٹ