ہانگ کانگ سکسز ٹورنامنٹ کیلئے پاکستان کرکٹ ٹیم کی روانگی

رپورٹ: فیضان لاکھانی۔۔۔ ہانگ کانگ سکسز ٹورنامنٹ میں شرکت کے لیے پاکستان ٹیم براستہ بنکاک ، ہانگ کانگ کیلئے روانہ ہوگئی۔

پاکستان ٹیم فہیم اشرف کی قیادت میں گزشتہ شب براستہ بنکاک ، ہانگ کانگ کیلئے روانہ ہوئی، ٹیم میں آصف علی، عامر یامین، دانش عزیز ، حسین طلعت، شہاب خان اور محمد اخلاق بھی شامل ہیں۔

ہانگ کانگ سکسز ٹورنامنٹ یکم سے تین نومبر تک کھیلا جائے گا اور ایونٹ میں شریک 12 ٹیموں کو چار گروپس میں تقسیم کیا گیا ہے۔

پاکستان ٹیم پول سی میں بھارت اور یو اے ای کے ساتھ شامل ہے اور یکم نومبر کو پاکستان ٹیم پہلا میچ یو اے ای اور دوسرا میچ بھارت سے کھیلے گی۔

ہر گروپ کی دو ٹاپ ٹیمیں کوارٹر فائنل کے لیے کوالیفائی کریں گی اور کوارٹر فائنل دو نومبر کو جبکہ سیمی فائنل اور فائنل تین نومبر کو ہوں گے۔