عاقب جاوید کا لاہور قلندرز کے ساتھ سفر ختم

عاقب جاوید کا لاہور قلندرز کےساتھ سفر نیشنل ڈیوٹی کی وجہ سے خوش اسلوبی کے ساتھ اختتام پذیر ہو گیا۔

لاہور قلندرز کی جانب سے کہا گیا ہے کہ عاقب جاوید کا یہ سفر پاکستان کرکٹ میں ذمہ رایاں سنبھالنے کے بعد ختم ہو ا۔ عاقب جاوید نے 8 سال تک قلندرز کے ڈائریکٹر آف کرکٹ آپریشنز اور ہیڈ کوچ کے طور پر کامیابیاں حاصل کیں ۔ 52 سالہ عاقب جاوید نے جون 2016 میں لاہور قلندرز کو جوائن کیا اور ان کی کوچنگ میں ٹیم نے 2020 سے 2023 کے درمیان تین پی ایس ایل فائنلز کھیلے، جن میں دو مسلسل ٹائٹلز جیتے۔

ان کا لاہور قلندرز کے ساتھ تعلق انتہائی اہم رہا کیونکہ وہ قلندرز کے ویژن کو آگے بڑھانے میں کلیدی کردار ادا کرتے رہے، خاص طور پر فرنچائز کے اہم پلیئرز ڈیولپمنٹ پروگرام (پی ڈی پی) کےلیے اہم کردار ادا کیا۔ ان کی محنت اور لگن سے لاہور قلندرز نے نوجوان کھلاڑیوں کو تلاش کیا اور مستقبل کے لئے مضبوط بنیادوں پر ان کو سیکھنے کی بنیاد فراہم کی۔

لاہور قلندرز کے ساتھ اپنے سفر کے بارے میں عاقب جاوید نے کہا کہ میرا قلندرز کے ساتھ وقت ایک ناقابل فراموش سفر رہا ہے، جو یادگار لمحات اور اہم کامیابیوں سے بھرا ہوا ہے۔ ان برسوں میں مجھے قلندرز کے ویژن پر کام کرنے کا موقع ملا، خاص طور پر پلیئرز ڈیولپمنٹ پروگرام (پی ڈی پی) جو میرے دل کے قریب رہا ہے۔ نوجوان ٹیلنٹ کو ترقی کرتے اور اُبھرتے دیکھنا میرے لیے انتہائی اطمینان بخش رہا ہے۔

ملتان ٹیسٹ میں کامیابی کے بعد عاقب جاوید کی نظریں پنڈی کی پچ پر مرکوز

ملتان ٹیسٹ میں کامیابی کے بعد عاقب جاوید کی نظریں پنڈی کی پچ پر مرکوز

انہوں نے کہا کہ فرنچائز کی میدان کے اندر اور باہر کامیابیوں میں حصہ ڈالنا ایک قابل فخر تجربہ تھا، تاہم، 8 شاندار سالوں کے بعد مجھے محسوس ہوتا ہے کہ اب قومی ٹیم کے ساتھ نئے چیلنج کو قبول کرنے کا وقت آگیا ہے، میں پاکستان کرکٹ کے لیے اپنی خدمات پیش کرنے کے لیے پرجوش ہوں اور اُمید کرتا ہوں کہ میں اپنی مہارت اور جذبہ کے ساتھ ملک کے لیے نمایاں کردار ادا کر سکوں گا۔

اس بارے میں لاہور قلندرز کے سی او اوثمین رانا نے کہا کہ میں عاقب بھائی کا تہہ دل سے شکریہ ادا کرنا چاہتا ہوں کہ انہوں نے ہمارے ساتھ ان برسوں میں جو کامیابیاں حاصل کیں ان پر فخر کر سکتے ہیں اور قلندرز کے ویژن اور فلسفے کو بلند کرنے میں ان کی انتھک محنت کا شکریہ اداکرتا ہوں۔ پی ایس ایل ٹائٹل جیتنے سے لے کر پی ڈی پی کے ذریعے نوجوان ٹیلنٹ کی نشوونما تک، عاقب کی میراث ہمیشہ قلندرز کےلیے باعث فخر ہے۔

ثمین رانا نے کہا کہ ہم بوجھل دل کے ساتھ الگ ہورہے ہیں لیکن ہم ان کے پاکستان کرکٹ کے ساتھ نئے سفرپر خوش ہیں، ہماری ان کے لئے نیک خواہشات ہیں اور ہمیں یقین ہے کہ عاقب کا لاہور قلندرز کے ساتھ حاصل کیا گیا تجربہ انہیں قومی سطح پر پی ڈی پی کے ویژن کو جاری رکھنے اور مثبت کردار ادا کرنے کے قابل بنائے گا۔

انہوں نے کہا کہ لاہور قلندرز نے قومی ٹیم کےلئے ٹیلنٹ کو ڈویلپ کرنے کے لیے ہمیشہ اہم کردار ادا کیا ہے اب عاقب جاوید کا نیشنل منجمنٹ میں جانا ملکی کرکٹ کو سپورٹ کرنے کی ایک مثال ہے۔