October 18, 2024 | 12:59 pm

ملتان ٹیسٹ میں کامیابی کے بعد عاقب جاوید کی نظریں پنڈی کی پچ پر مرکوز

رپورٹ: سہیل عمران۔۔۔ پاکستان ٹیسٹ ٹیم نے انگلینڈ کو چوتھے دن ہی 152 رنز سے شکست دے دی اس اہم کامیابی کے بعد اب قومی ٹیم کے سلیکٹرز پنڈی ٹیسٹ کی پچ سے بھی ہوم ایڈوانٹیج لینے کے خواہشمند ہیں۔

ذرائع کا بتانا ہے کہ سلیکٹر عاقب جاوید کی پنڈی ٹیسٹ کی پچ پربھی خصوصی توجہ ہے اور انہوں نے پنڈی کرکٹ اسٹیڈیم کے گراؤنڈ اسٹاف کو خصوصی ہدایات دے دیں ہیں۔

ذرائع کے مطابق پنڈی میں بھی ملتان ٹیسٹ کی طرح اسپن وکٹ تیارکرنے کی کوشش کی جائے گی اور تیسرے ٹیسٹ کے لئےروایت سے ہٹ کر پچ بنانے کی کوشش کی جائے گی۔

ذرائع کا یہ بھی کہنا ہے کہ پنڈی اسٹیڈیم کی پچ کو ہرممکن ڈرائی رکھنے کی کوشش کی جائے گی جبکہ اسکوائر کو بھی ڈرائی رکھنے کی کوشش کی جا رہی ہے۔

واضح رہے کہ عاقب جاوید پچ کی تیاری دیکھنے کے لیے راولپنڈی بھی جائیں گے۔ پاکستان اور انگلینڈ کےدرمیان تیسرا اور فیصلہ کن ٹیسٹ میچ 24 اکتوبر سے پنڈی کرکٹ اسٹیڈیم میں کھیلا جائے گا۔