آسٹریلیا نے پاکستان کیخلاف سیریز کیلئے اسکواڈ کا اعلان کر دیا

کرکٹ آسٹریلیا نے پاکستان کے خلاف ون ڈے سیریز کے لیے اسکواڈ کا اعلان کر دیا ہے جبکہ تین ٹی ٹوئنٹی میچز کے لیے ٹیم کا اعلان بعد میں کیا جائے گا۔

پاکستان کے خلاف ون ڈے سیریز میں پیٹ کمنز ٹیم کی قیادت کریں گے جبکہ شین ایبٹ ،کوپر کنولی،جیک فریزر مکگرک اور ایرون ہارڈی اسکواڈ میں شامل ہیں۔

ان کے علاوہ جوش ہیزل ووڈ ،جوش انگلس، مارنوس لابوشین اور گلین میکسویل بھی شامل ہیں جبکہ اسٹیو اسمتھ، میچل اسٹارک، میتھیو شارٹ، مارکوس اسٹوئنس اور ایڈم زمپا بھی اسکواڈ کا حصہ ہیں ، میچل مارش اور ٹریوس ہیڈ پیرنٹل چھٹیوں پر ہیں۔

پاکستان کے خلاف اس سیریز کے بارے میں چیف سلیکٹر جارج بیلی کا کہنا ہے کہ اسکواڈ میں توازن برقرار رکھنے کی کوشش کی ہے کیونکہ چیمپئینز ٹرافی سے قبل یہ آخری ون ڈے سیریز ہے۔

جارج بیلی کا یہ بھی کہناتھا کہ فروری میں پاکستان میں ہونے والی چیمپئینز ٹرافی کے لیے اپنے اسکواڈ کے تجربے کو بڑھانے کا موقع ہے۔

پاکستان اور آسٹریلیا کے درمیان تین ون ڈے میچز کی سیریز 4، 8 اور 10 نومبر کو کھیلی جائے گی جبکہ تین ٹی ٹوئنٹی میچز پر مشتمل سیریز 14، 16 اور 18 نومبر کو کھیلے جائیں گے۔