مجھے ڈاکٹرز نے چیمپئین شپ بھول جانے کا کہا تھا: اولمپئین ماحور شہزاد

رپورٹ: سہیل عمران۔۔۔ مسلسل 8 ویں مرتبہ نیشنل بیڈ منٹن چیمپئین کا اعزاز حاصل کرنے والی اولمپئین ماحور شہزاد کا کہنا ہے کہ میں کچھ عرصہ پہلے بیٹی کی ماں بنی ہوئی ہوں مجھے چار ماہ تک ٹریننگ کرنے سے سختی سے منع کیا گیا تھا اور مجھے ڈاکٹرز نے چیمپئین شپ بھول جانے کا کہا لیکن میں آسانی سے ٹائٹل کسی دوسرے کے ہاتھ میں جانے نہیں دینا چاہتی تھی۔

لاہور میں جیو نیوز سے گفتگو کرتے ہوئے اولمپئین ماحور شہزاد نے کہا کہ نیشنل چیمپئین شپ سال میں ایک بار ہوتی ہے اس لیے میں ہر صورت یہ ایونٹ کھیلنا چاہتی تھی تاکہ ٹائٹل کسی اور کے پاس نہ جانے دوں۔

اس لئے میں نے فیصلہ کیا کہ میں چاہے ہاروں مجھے چیمپئین شپ میں حصہ لینا ہے اور اپنا بہترین کھیل پیش کرنا ہے جس میں میں کامیاب ہوئی اور مسلسل 8 ویں مرتبہ ٹائٹل جیتا جس پر میں بہت خوش ہوں۔

ماحور شہزاد نے کہا کہ ایک چھوٹی بیٹی کے ساتھ جس کو صرف اپ نے سنبھالنا ہوتا ہے ایسے میں بہت مشکل ہوتا ہے میں نے بہت مشکل سے ٹریننگ کے لیے وقت نکالا آدھا گھنٹہ بھی ملتا تو ٹریننگ کرتی۔

انہوں نے کہ تین ماہ کی بیٹی حور العین ہے میچز کے دوران ساتھ بھی نہیں رکھ سکتی میچز کے دوران والدہ نے سنبھالا کیونکہ چھوٹی ہے تو رو رہی ہو تو پھر ماں کا دل ایسا ہوتا ہے کہ آپ میچ چھوڑ کر سنبھالنے چلی جاؤں۔

ماحور شہزاد کا کہنا ہے کہ ہمیں انٹرنیشنل ایونٹس زیادہ ملنے چاہیئں آپس میں کھیلنے کا کوئی فائدہ نہیں پاکستان میں بھی انٹرنیشنل ایونٹس ہونے چاہیئں تاکہ زیادہ سے زیادہ ملکی کھلاڑیوں کو موقع ملے۔

انہوں نے اس عزم کا اظہار کیا کہ اب میرا پلان ورلڈ رینکنگ کو بہتر کرنا ہے بیٹی کی ولادت کے باعث ایک عرصہ سے انٹرنیشنل ایونٹس نہیں کھیل سکی اب کوشش ہے زیادہ سے زیادہ ایونٹس میں شرکت کروں۔