گھروں کی کھڑکیوں کے شیشے ٹوٹ جانے کے باعث چھکا مارنے پر پابندی

رپورٹ: سہیل عمران۔۔۔ دنیا کے ایک قدیم کلب نے کھلاڑیوں پر چھکا مارنے پر پابندی لگا دی ہے کیونکہ گراؤنڈ کے ساتھ واقع گھروں کے رہائشیوں نے بالز سے ہونے والے نقصان پر شکایت کی تھی۔ یہ کلب 1790 میں برائٹن کے قریب قائم کیا گیا ۔

برطانوی میڈیا کے مطابق دنیا کے ایک قدیم کلب ساؤتھ وک اینڈ شورہم کلب نے کھلاڑیوں پر چھکا مارنے پر پابندی لگا دی ہے کیونکہ مقامی لوگوں نے شکایت کی تھی کہ بالز سے ان کے گھروں کی کھڑکیوں ، کاروں اور شیڈز کو نقصان پہنچ رہا ہے اور حتی کہ بالز مقامی لوگوں کو لگتے بھی ہیں۔

بیٹرز کو بتا دیا گیا ہے پہلے چھکے پر کوئی رن نہیں ملے گا جبکہ دوسرا چھکا مارنے پر بیٹر کو آؤٹ قرار دے دیا جائے گا دوسری جانب ایک بیٹر نے چھکے کو کھیل کی شان قرار دیتے ہوئے اس پابندی کو مضحکہ خیز قرار دیا ہے ۔

بیٹر کا کہنا ہے کہ انشورنس کمپنیاں کھیلوں میں کام کر رہی ہیں ، ان کا فائدہ اٹھانا چاہیے ، اگر آپ کرکٹ گراؤنڈ کے ساتھ گھر خریدتے ہیں تو اپنے گارڈن میں چند بالز کی توقع بھی رکھیں ،گراؤنڈ کے ساتھ رہنے والے کچھ رہائشیوں نے پابندی کو خوش آئند قرار دیا ہے۔

ایک رہائشی کا کہنا ہے کہ میرے باپ، دادا اس گھر میں رہتے رہے ہیں شروع سے بالز سے گھر میں نقصان ہوا ، ایک رہائشی نے کہا کہ میں پابندی سے متفق نہیں ہوں ، میرے گھر میں کبھی بال نہیں آئے ، مانا گراؤنڈ چھوٹا ہے لیکن چھکا کھیل کا ایک خوبصورت حصہ ہے۔