آئی سی سی بورڈ ممبران ٹی ٹوئنٹی ورلڈ کپ کے معاملات پر ناراض

رپورٹ: فیضان لاکھانی۔۔۔ انٹرنیشنل کرکٹ کونسل (آئی سی سی) کے بورڈ ممبران ٹی ٹوئنٹی ورلڈ کپ کے معاملات پر ناراض ہیں۔

اس حوالے سے رپورٹ میں کہا گیا ہے کہ ورلڈ کپ کے مالی اور آپریشنل معاملات پر بورڈ میٹنگ میں سوالات ہوں گے کہ امریکا میں ورلڈ کپ میچز کے لیے دو کروڑ ڈالرز کی اضافی رقم لی گئی تھی۔

رپورٹ کے مطابق امریکا میں ورلڈ کپ کے میچز کیلئے آئی سی سی نے ایک علیحدہ آزاد کمپنی قائم کی تھی اور اس کمپنی نے آئی سی سی سے منظور بجٹ کے علاوہ دو کروڑ ڈالرز کی درخواست کی تھی۔

اس بارے میں ایک بورڈ ڈائریکٹر نے انکشاف کیا ہے کہ رقم کیش ادائیگیوں کے لیے بطور لون طلب کی گئی تھی۔

جبکہ رپورٹ میں اس بات کا بھی تذکرہ ہوا ہے کہ امریکا میں ٹی ٹوئنٹی ورلڈ کپ میچز کے لیے ساڑھے چار کروڑ ڈالرز کا بجٹ رکھا گیا تھا جس میں سے ڈیڑھ کروڑ ڈالر آپریشن اور تین کروڑ ڈالر نساؤ اسٹیڈیم کی تعمیر کیلئے مختص تھے، آئی سی سی بورڈ ممبران ہوشربا بجٹ پر بھی ناراض ہیں۔

اس کے علاوہ رپورٹ میں یہ بات بھی سامنے آئی ہے کہ آئی سی سی بورڈ میٹنگ میں ویسٹ انڈیز میں ہونے والے میچز میں خالی اسٹیڈیم اور خراب پچوں پر بھی ویسٹ انڈیز سے سوالات ہوں گے، ورلڈ کپ کا مین ہوسٹ ویسٹ انڈیز تھا۔

رپورٹ کے مطابق انڈین براڈکاسٹ مارکیٹ کی وجہ سے ویسٹ انڈیز میں صبح کے وقت میچز رکھے گئے جبکہ ویسٹ انڈیز اور امریکا کی لوکل آرگنائزنگ کمیٹی میں روابط کا فقدان بھی رہا۔