June 19, 2024 | 02:24 pm

حارث کی حمایت کیساتھ ٹیم قوم سے بھی معافی مانگے: احمد شہزاد

پاکستان کرکٹ ٹیم کے فاسٹ بولر حارث رؤف سے فلوریڈا میں ایک مداح نے بدتمیزی کی جس پر حارث رؤف اور مداح کے درمیان گرما گرمی دیکھنے میں آئی اس معاملے پر ساتھی کرکٹرز اور چیئرمین پی سی بی نے بھی شدید مزمت کی اور حارث رؤف کی مکمل حمایت کی۔

اسی حوالے سے قومی کرکٹر احمد شہزاد کا کہنا ہے کہ جہاں ہم حارث رؤف کے ساتھ پیش آنے والے واقعے کی مکمل مذمت کرتے ہیں وہیں یہ بات بھی اہم ہے کہ کھلاڑیوں کی جانب سے حارث کو سپورٹ کرنے کے لیے جو پوسٹس لگائی گئی ہیں وہ ورلڈ کپ میں ان کی خراب کارکردگی کی وجہ سے شائقین سے معذرت کے طور پر ہونی چاہیے تھیں۔

کرکٹر احمد شہزاد کے ایکس (ٹوئٹر) کا اسکرین شاٹ

انہوں نے مزید لکھا کہ اچھا ہوتا اگر یہ کھلاڑی قوم سے معافی مانگتے، اگر یہ کھلاڑی شرمندہ ہوتے اور یہ کھلاڑی امریکہ، انگلینڈ یا دبئی میں چھٹیاں گزارنے کی بجائے پاکستان واپس آجاتے۔

احمد شہزاد نے کہا کہ کھلاڑیوں کی ان پوسٹس سے بیانیہ نہیں بدلنا چاہیے اور شائقین کو کھلاڑیوں کی خراب پرفارمنس کا جواب ملنا چاہیے۔ احتساب اب بہت ضروری ہے، کھلاڑیوں کے ایک ہی گروپ نے پچھلے پانچ سالوں میں ہمارے ملک کے لیے کچھ نہیں جیتا اور پاکستان کی اجتماعی کامیابی کو ترجیح دینے کے بجائے ذاتی سنگ میل کو ترجیح دیتے رہے۔

اگر سلیکٹرز کو لگتا ہے کہ میں بہتر ہوں تو ٹیم کیلئے دستیاب ہوں : احمد شہزاد

یہاں یہ بات قابلِ ذکر ہے کہ آئی سی سی ٹی ٹوئنٹی ورلڈ کپ میں آج سے سپر 8 مرحلہ شروع ہونے جارہا ہے مگر پاکستان ٹیم اپنے گروپ میچز میں ہی باہر ہوگئی تھی۔

پاکستان ٹیم اپنا پہلا میچ امریکہ کے ہاتھوں سپر اوور میں ہاری پھر روایتی حریف بھارت نے 6 رنز سے شکست دی اس کے قومی ٹیم نے کینیڈا اور آئر لینڈ کے خلاف بالترتیب 7 اور 3 وکٹوں سے کامیابی حاصل کی۔