کیا بابراعظم کو ایک بار پھر کپتانی سے ہاتھ دھونا پڑے گا؟

آئی سی سی ٹی ٹوئنٹی کرکٹ ورلڈ کپ میں پاکستان ٹیم کی ناقص پرفارمنس کی وجہ سے ٹیم میں تبدیلیوں کا امکان ہے۔

قومی ٹیم کے کپتان بابراعظم کے بارے میں ذرائع کا بتانا ہے کہ فی الحال انہیں وائٹ بال کا کپتان برقرار رکھا جائے گا۔

بابراعظم ورلڈکپ کے بعد نومبر میں آسٹریلیا کے خلاف سیریز میں ٹیم کی کپتانی کریں گے۔

جیو نیوز سے خصوصی گفتگو کرتے ہوئے محسن نقوی سے سوال کیا گیا کہ ٹیم کی حالیہ کارکردگی کے بعد کیا فیصلے کیے جا رہے ہیں؟

ٹیم کی سرجری سے متعلق محسن نقوی کا بیان

ٹیم کی سرجری سے متعلق محسن نقوی کا بیان

اس پر محسن نقوی نے جواب دیا کہ ابھی ٹیم میچز کھیل رہی ہے، قوم کو ٹیم سے متعلق فیصلوں کے لیے انتظار کرنا چاہیے، ابھی ٹیم کے ٹی 20 ورلڈ کپ میں میچز باقی ہیں، ٹورنامنٹ کا حتمی نتیجے کا انتظار کرنا چاہیے۔

چیئرمین پی سی بی نے یہ بھی کہا کہ ٹیم کو ابھی سپورٹ کی ضرورت ہے، جیسی بھی ٹیم ہے اسے لے کر اس ٹورنامنٹ میں آگے چلنا ہے۔

محسن نقوی کا کہنا تھا کہ سب لوگ دعا کر رہے ہیں کہ ٹیم آگے پہنچے، مشاورت جاری ہے فی الحال اس موقع پر اس متعلق مزید بات کرنا مناسب نہیں۔

یاد  رہے کہ ٹی ٹوئنٹی ورلڈ کپ میں پاکستان ٹیم کی امریکہ کے ہاتھوں شکست اور پھر روایتی حریف بھارت سے میچ ہارجانے کے بعد چیئرمین پی سی بی محسن نقوی کا کہنا تھا کہ لگتا تھا کہ کرکٹ ٹیم کا چھوٹی سرجری سے کام چل جائے گا مگر آج کی انتہائی خراب کارکردگی کے بعد یقین ہوگیا ہے کہ ٹیم میں بڑی سرجری کی ضرورت ہے۔