چیئرمین بی سی بی محسن نقوی نے انگلش بورڈ سے کیا درخواست کی؟

رپورٹ: سہیل عمران۔۔۔ پاکستان کرکٹ ٹیم کو انگلینڈ کرکٹ بورڈ نے دو سیکورٹی آفیسر مہیا کر دیئے ہیں۔

خیال رہے کہ کپتان بابر اعظم سمیت دیگر کھلاڑیوں کو ہوٹل سے باہر نکلتے وقت فینز گھیر لیتے تھے اور فینز کے گھیرنے کی وجہ سے ناخوشگوار ویڈیوز سامنے آ رہی تھیں۔

اس بارے میں ذرائع کا بتانا ہے کہ اضافی سیکورٹی آفیسرز قومی کھلاڑیوں کی نقل و حرکت کے دوران موجود ہوں گے۔

ذرائع کا یہ بھی بتانا ہے کہ پاکستان کرکٹ بورڈ (پی سی بی) کے چیئرمین محسن نقوی کی درخواست پر انگلینڈ بورڈ نے سیکورٹی آفیسرز تعینات کیئے ہیں۔

سوشل میڈیا میں ایک ویڈیو گردش کررہی ہے جس میں دیکھا جاسکتا ہے کہ کارڈف میں پاکستانی کرکٹ ٹیم کے کپتان بابر اعظم پرستاروں سے ناراض دکھائی دے رہے ہیں اور انہوں نے مداحوں سے درخواست کی کہ وہ کسی دوست سے ملنے آئے ہیں انہیں کچھ لمحے تنہائی میں بات کرنے کی اجازت دی جائے۔

ویڈیو میں دیکھا جاسکتا ہے کہ بابر اعظم کو ٹیم ہوٹل سے باہر آتے ہی شائقین نے گھیر لیا اس موقع پر ہوٹل سیکیورٹی اسٹاف نے مداخلت کی، بابر اعظم نے کہا کہ یار دو منٹ دے دو، اوپر چڑھے جا رہے ہو، بات کررہا ہوں اور آپ ویڈیو بنارہے ہیں مگر پھر بعد میں انہوں نے پرستاروں کے ساتھ سیلفیاں بھی بنوائیں۔