پاکستان کی وہیل چیئرکرکٹ ٹیم کی مسلسل دوسری بار ایشین چیمپئن شپ میں فتح

رپورٹ: سہیل عمران۔۔۔ پاکستان کی وہیل چیئرکرکٹ ٹیم نے مسلسل دوسری بار ایشین چیمپئن شپ میں فتح حاصل کرلی ہے۔

چیئرمین پاکستان کرکٹ بورڈ محسن نقوی کی خصوصی دعوت پر وہیل چیئرکرکٹ ٹیم کے کھلاڑیوں کی قذافی سٹیڈیم آمد ہوئی اور وہیل چیئر کرکٹ کے کھلاڑیوں کی چیئرمین پی سی بی محسن نقوی سے ملاقات ہوئی۔

اس موقع پر چیئرمین پی سی بی محسن نقوی نے کھلاڑیوں کو ایشین چیمپئن شپ جیتنے پر مبارکباد دی اور ان کی کارکردگی کو سراہا اور کھلاڑیوں کی بھرپور حوصلہ افزائی کرتے ہوے 15 لاکھ روپے کا چیک دیا۔

چیئرمین پی سی بی محسن نقوی نے وہیل چیئر کرکٹ ٹیم کے لئے نیک خواہشات کا اظہار کرتے ہوئے کہا کہ ٹیم کی کامیابیوں پر دلی خوشی ہوئی ہے اور پی سی بی وہیل چیئرکرکٹ ٹیم کی سپورٹ جاری رکھے گا۔

وہیل چیئرکرکٹ ٹیم کے کھلاڑیوں نے قذافی سٹیڈیم بلا کر حوصلہ افزائی کرنے پر چیئرمین پی سی بی محسن نقوی کا شکریہ ادا کیا اور چیئرمین پی سی بی سے گفتگو کرتے ہوئے کہا کہ آپ نام کے ساتھ کرکٹ کے بھی محسن ہیں۔

چیئرمین پی سی بی نے کہا کہ اُمید ہے کہ وہیل چیئرکرکٹ ٹیم آئندہ بھی ٹورنامنٹس جیت کر پاکستان کا نام روشن کرے گی۔

چیئرمین پی سی بی محسن نقوی سے ملاقات کرنے والوں میں وہیل چیئر کرکٹ کونسل کی چیئرپرسن رخسانہ راجپوت، وہیل چیئر کرکٹ ٹیم کے کپتان محمد ذیشان، نائب کپتان عمران ارائیں ، بیٹسمین سید ارسلان احمد، وکٹ کیپر بیٹر معظم نواز اور دنیا کے تیز ترین باؤلر محمد فیاض شامل تھے۔

ان کے علاوہ چیف آپریٹنگ آفیسر پی سی بی سلمان نصیر، ڈائریکٹر ڈومیسٹک کرکٹ عبداللہ خرم نیازی، سینئر جنرل مینجر ڈومیسٹک کرکٹ جیند ضیا اور متعلقہ حکام بھی اس موقع پر موجود تھے۔

واضح رہے کہ پاکستانی وہیل چیئر کرکٹ ٹیم نے نیپال میں ہونے والے فائنل میں سری لنکا کو ہرا کر ایشین چیمپئن شپ جیتی تھی۔