محسن نقوی شعبہ میڈیکل سے خوش نہیں، نئے سربراہ کی تلاش

پاکستان کرکٹ بورڈ (پی سی بی) نے فیصلہ کیا ہے کہ شعبہ میڈیکل اینڈ اسپورٹس میڈیسن کے سربراہ کی تلاش کے لیے اشتہار دیاجائے گا۔

اس بارے میں ذرائع کا بتانا ہے کہ پی سی بی نے شعبہ میڈیکل اینڈ اسپورٹس میڈیسن کو ازسرنو ترتیب دینے کا فیصلہ کیا ہے لہٰذا بورڈ اس ڈیپارٹمنٹ کے سربراہ کی تلاش کے لیے اشتہار دے گا۔

ذرائع کا کہنا ہے کہ سربراہ کے انتخاب کے لیے میڈیکل کے سربراہان کی کمیٹی تشکیل دی جائے گی، اسسٹنٹ پروفیسر کو شعبے کی زمہ داریاں سونپی جائیں گی اور پاکستان کی ٹیموں کے لیے تجربہ کار میڈیکل پینل تشکیل دیا جائے گا۔

ذرائع کے مطابق چیئرمین محسن نقوی شعبہ میڈیکل اور اسپورٹس میڈیسن کی کارکردگی سے خوش نہیں اس لیے میڈیکل کے شعبے کو جدید خطوط پر چلانے کے لیے حکمت عملی ترتیب دی جا رہی ہے۔

واضح رہے کہ ڈاکٹر سہیل سلیم کے مستعفی ہونے کے بعد میڈیکل کے شعبے کے سربراہ کا عہدہ خالی ہے۔