ٹونی ہیمنگز پی سی بی میں چیف کیوریٹر بننے کیلئے مضبوط اُمیدوار

رپورٹ: سہیل عمران۔۔۔ پاکستان کرکٹ بورڈ (پی سی بی) میں ٹونی ہیمنگز چیف کیوریٹر کا عہدہ سنبھالنے کے لیے مضبوط امیدوار ہیں۔

ذرائع کے مطابق چیف کیوریٹر کی تلاش کے لیے پی سی بی نے اشتہار دیا تھا اور 16 مئی تک درخواستیں طلب کی گئی تھیں۔

ذرائع کا بتانا ہے کہ چند روز میں چیف کیوریٹر کا اعلان ہوگا اور آسٹریلیا سے تعلق رکھنے والے ٹونی ہیمنگز کے ساتھ بات چیت جاری ہے، ٹونی آئی سی سی کرکٹ اکیڈمی کے سابق ہیڈ کیوریٹر ہیں، وہ پرتھ اسٹیڈیم میں بھی خدمات انجام دے چکے ہیں جب کہ سعودی عرب میں فٹ بال گراؤنڈز تیار کرنے کا بھی تجربہ رکھتے ہیں۔

ذرائع کے مطابق چیمپئنز ٹرافی سے قبل تین وینیوز کے گراؤنڈز اور پچز کی تیاری غیر ملکی کیوریٹر کی ذمہ داری ہوگی اور ٹونی ہیمنگز اس میں آغا زاہد کی جگہ لینے کے لیے مضبوط امیدوار ہیں۔

ذرائع کے مطابق غیر ملکی کیوریٹر پاکستان کے کیوریٹرز اور گراؤنڈ اسٹاف کو بھی جدید تقاضوں کے مطابق تیار کریں گے۔