قومی ہاکی ٹیم کو آج یورپ کا ویزا ملنے کی اُمید

پاکستان ہاکی ٹیم کی ویزے میں تاخیر کی وجہ سے ہالینڈ روانگی مزید تاخیر کا شکار ہوگئی، پاکستان ٹیم کا آج ہالینڈ کے خلاف میچ کھیلا جانا تھا۔

اس بارے میں پاکستان ہاکی فیڈریشن (پی ایچ ایف) حکام نے اُمید ظاہر کی ہے کہ آج شام تک کھلاڑیوں کو ویزا مل جائے گا جس کے بعد ٹیم بدھ یا جمعرات کو ہالینڈ روانہ ہوگی۔

ٹیم کی روانگی میں تاخیر کے باعث پاکستان اور ہالینڈ کے درمیان آج کا ہونے والا میچ بھی ملتوی کردیا گیا ہے اور اب یہ میچ پاکستانی ٹیم کے ہالیند پہنچنے کے بعد کھیلا جائے گا۔

قومی ٹیم وہاں دو سے تین دن ٹریننگ بھی کرے گی جس میں ہالینڈ کی مختلف اکیڈمیز اور کلبوں کے کھلاڑیوں کو بھی مدعو کیا جائے گا۔

علم میں رہے کہ قومی ہاکی ٹیم ہالینڈ سے پولینڈ روانہ ہوگی جہاں پولینڈ میں نیشنز کپ 31 مئی سے شروع ہوں گے اور اگر  پاکستان ٹیم نیشن کپ ایونٹ میں پہلی تین پوزیشن میں جگہ حاصل کرلیتی ہے تو پرو لیگ کیلئے کوالیفائی کرجائے گی۔