اُمید ہے ورلڈ کپ میں پاکستان ٹیم اچھا پرفارم کرے گی: امریکی قونصل جنرل

رپورٹ: فیضان لاکھانی۔۔۔ کراچی میں امریکی قونصل جنرل کونراڈ ٹریبل کا کہنا ہے کہ امریکا میں پہلی بار کرکٹ ورلڈ کپ کے انعقاد پر امریکی عوام کافی پرجوش ہے، ورلڈ کپ کے انعقاد سے امریکا میں ایک ایسے کھیل کو دوبارہ مقبولیت ملے گی جو پہلے جنوبی ایشیائی کمیونٹی تک محدود تھا۔ کھیل عوام کو قریب لانے کا بہترین ذریعہ ہوتے ہیں اور اُمید ہے کہ ورلڈ کپ میں پاکستان ٹیم اچھا پرفارم کرے گی ۔

جیو نیوز کو خصوصی انٹرویو میں ان کا کہنا تھا کہ امریکا میں پہلا بار اس بڑے پیمانے کا ایونٹ، کرکٹ ورلڈ کپ ہورہا ہے جس پر وہ بہت پرجوش ہیں، امریکی عوام بھی کافی پرجوش ہیں، یہ امریکا کیلئے ایک زبردست موقع ہے کہ وہ اپنے ملک میں کرکٹ دیکھے اور پاکستان سمیت پوری دنیا کو امریکا دکھائے، ہم ہر کوئی اس ایونٹ کیلئے کافی پرجوش ہے اور امید رکھتا ہے کہ اس سے امریکا میں کرکٹ کو فروغ حاصل ہوگا۔

ایک سوال پر انہوں نے کیا کہ اسپورٹس میں عوام کو ایک دوسرے سے جوڑنے کی طاقت ہے، یہ عوامی روابط بنانے کا سب سے بہترین اور سب سے آسان ذریعہ ہیں کیوں کہ ہر کوئی اسپورٹس سے محبت کرتا ہے، چاہے وہ پاکستانی ہو، انڈین ہو، ویسٹ انڈین ہو یا امریکی، جب ان کی ٹیم کھیل رہی ہوتی ہے تو ہر کوئی اپنی ٹیم کیلئے پرجوش ہوتا ہے ۔

کونراڈ ٹریبل کا کہنا تھا کہ پاکستان اور بھارت کا 9 جون کو ہونے والا میچ بلاشبہ سب کی توجہ کا مرکز ہوگا لیکن ان کی نظریں اس سے تین روز قبل ہونے والے پاکستان اور امریکا کے میچ پر ہے کیوں کہ بطور پاکستان میں مقیم امریکی سفیر، ان کیلئے وہ میچ زیادہ اہم ہے، امید ہے کہ اس میں بھی اچھا مقابلہ دیکھنے کو ملے گا ۔

پاک ۔ بھارت میچ پر بات کرتے ہویے ان کا کہنا تھا کہ یہ میچ کسی بھی کرکٹ فین کیلئے سب سے اہم میچ ہوگا، اس پر ہر کسی کی نظر ہوگی اور کیوں نہ ہو، ایسے ہی مقابلے تو اسپورٹس کیلئے اہم ہوتے ہیں جس میں لوگوں کو جوش ملے ، جذبہ ملے ۔

ایک سوال پر ان کا کہنا تھا کہ بہت سے لوگوں کو یہ علم نہیں لیکن ایک وقت ایسا تھا جب کرکٹ امریکا میں کافی مقبول تھا، یہاں تک کہ جارج واشنگٹن نے بھی کرکٹ کھیلی ہے،جارج واشنگٹن نے وکٹس کا کھیل کھیلا جو درحقیقت کرکٹ تھا، کرکٹ ابتدائی 100 برس تک امریکا میں کافی مقبول رہا پھر اس کی جگہ بیس بال نے لے لی مگر موجودہ دور میں کرکٹ میں امریکا پاوور ہاوس نہیں ، ابھی یہ کھیل یہاں دوبارہ ترقی پا رہا ہے، لیگز کا انعقاد ہونے لگا ہے، نوجوان اس کھیل میں دلچسپی لے رہے ہیں ۔ تاہم وہ پر امید تھے کہ ورلڈ کپ کے انعقاد سے امریکا میں کرکٹ مقبول ہوگی ۔

ان کا کہنا تھا کہ ’’میرے خیال میں جیسا کہ ہم نے گزشتہ چالیس ، پچاس سال کے دوران امریکا میں فٹ بال کی ترقی دیکھی ہے جو پہلے مقبول نہیں تھا لیکن اب ہوچکا ہے، کرکٹ کا بھی یہی مستقبل ہوسکتا ہے اور یہ تیزی سے ان کھیلوں میں آسکتا ہے کہ جو بہت زیادہ مقبولیت رکھے ۔‘‘

انہوں نے مزید کہا کہ ’’ایک بات جو کافی اہم ہے اور اس ٹورنامنٹ سے مزید اہمیت حاصل کرے گی وہ یہ کہ چند کمیونیٹی تک محدود کھیل اب تیزی سے پھیل رہا ہے اور یہ ہماری مضبوطی ہے جس پر مجھے فخر ہے کہ ہم دنیا کے بہترین کرکٹرزکی مدد سے اس کو مزید فروغ دے رہے ہیں اور مجھے یقین ہے کہ ہم جلد کرکٹ کی ایک مضبوط ٹیم بن کر اُبھریں گے اگر اس ٹورنامنٹ میں نہیں تو یقینی طور پر بہت جلد‘‘۔

ایک سوال پر امریکی سفیر نے کہا کہ پاکستان میں رہتے ہوئے انہیں کرکٹ سے کافی دلچسپی ہوگئی ہے اور گزشتہ دنوں پاکستان سپر لیگ کے میچز دیکھنے گئے تھے اور ان میچز کو انہوں نے خوب انجوائے کیا۔

کونراڈ ٹریبل کا کہنا تھا کہ ورلڈ کپ میں پاکستان ایک اہم ٹیم ہوگی ، انہوں نے کسی انفرادی پلیئر پر تبصرے سے گریز کرتے ہوئے کہا کہ انہیں مجموعی طور پر پاکستان سے اچھے کھیل کی اُمید ہے، امریکی ٹیم پہلا میچ پاکستان سے کھیل رہی ہے جو اس کیلئے ٹف میچ ہوگا ، ٹورنامنٹ میں پاکستان کو ہرانا آسان نہیں ہوگا۔

انہوں نے کہا کہ امریکا کیلئے کوئی خصوصی ویزے نہیں لیکن امریکی قونصلیٹ کی جانب سے لوگوں کی رہنمائی کا سلسلہ جاری ہے تاکہ وہ امریکا سفر کیلئے تیاری کرسکیں ۔