آئی پی ایل سے ممکنہ تصادم، پی ایس ایل 2025 کیلئے اہم پلیئرز کو قبل از وقت سائن کرنے پر غور

رپورٹ: فیضان لاکھانی۔۔۔ پاکستان کرکٹ بورڈ (پی سی بی) نے اگلے سال پاکستان سپر لیگ (پی ایس ایل) کے انڈین پریمیئر لیگ (آئی پی ایل) سے ممکنہ تصادم کے پیش نظر اہم پلیئرز کو قبل از وقت سائن کرنے پر غور شروع کردیا۔ ان پلیئرز کو پلاٹینم کیٹیگری میں شامل پلیئرز سے زیادہ رقم ملے گی۔

پاکستان کرکٹ بورڈ نے 2025 پی ایس ایل کےلیے 7 اپریل سے 20 مئی کی تاریخیں تجویز کی ہیں۔ ان تاریخوں میں انڈین پریمیئر لیگ بھی ہوتی ہے جس کی وجہ سے اہم پلیئرز کی دستیابی کا مسئلہ درپیش ہوسکتا ہے۔

ذرائع کے مطابق اس مسئلے سے نمٹنے کےلیے پی سی بی اور پی ایس ایل انتظامیہ 6 سے 12 پلیئرز کی ایک فہرست تیار کرے گی۔ یہ فہرست پی ایس ایل انتظامیہ اور فرنچائز مل کر تیار کریں گی اور یہ ان پلیئرز پر مشتمل ہوگی جن کی پی ایس ایل میں شرکت کی گارنٹی ہوگی۔

ذرائع نے بتایا کہ ان پلیئرز کو مارکی پلیئر کا درجہ ضرور حاصل ہوگا تاہم یہ ڈرافٹ سے پک ہوں گے اور پلاٹینم کیٹیگری سے پک کیے جائیں گے۔ تاہم انہیں دیگر پلاٹینم پلیئرز سے اضافی معاوضہ دیا جائے گا۔

ذرائع کے مطابق مارکی پول کے پلیئرز کو ساڑھے تین لاکھ سے چار لاکھ ڈالرز تک رقم دی جاسکتی ہے۔ اس وقت پلاٹینم پلیئر دو لاکھ ڈالرز تک کی رقم ملتی ہے۔